អន្តរជាតិ
ដូនជីបារាំង Lucile ជាមនុស្សចាស់ជាងគេលើលោក ក្រោយមរណភាពលោកយាយជប៉ុន Tanaka
26, Apr 2022 , 9:29 pm
Sister Andre ដែលជាម្ចាស់កំណត់ត្រាថ្មី និងលោកយាយ Tanaka ដែលទើបទទួលមរណភាព
×![]()
ដោយ: ធីតា
ស្ត្រីជនជាតិបារាំងឈ្មោះ Lucile Randon ដែលមានរសហស្សនាមថា Sister André បានក្លាយជាម្ចាស់កំណត់ត្រាថ្មីរបស់សៀវភៅ Guinness World Records ក្នុងនាមជាបុគ្គលដែលនៅរស់ និងមានអាយុវែងជាងគេលើពិភពលោក។ គិតត្រឹមថ្ងៃទី២៦ ខែមេសា លោកយាយមានអាយុ១១៨ឆ្នាំ និង៧៤ថ្ងៃ។ ការទទួលស្គាល់នេះ គឺប្រកាសឡើងក្រោយមរណភាពលោកយាយជនជាតិជប៉ុន Kane Tanaka ក្នុងអាយុ១១៩ឆ្នាំ កាលពីថ្ងៃទី១៩ ខែមេសា ឆ្នាំ២០២២។
លោកយាយ Lucile ដែលបានប្រើប្រាស់ឈ្មោះ Sister André ចាប់ពីឆ្នាំ១៩៤៤មក គឺជាជនជាតិបារាំង និងជាជនជាតិអឺរ៉ុបទីបីដែលមានឈ្មោះក្នុងកំណត់ត្រា Guinness World Records ជាបុគ្គលដែលចាស់ជាងគេលើលោក។ គាត់បានឆ្លងកាត់ការងារជាគ្រូបង្រៀន និងជាអ្នកថែទាំក្មេងនាអំឡុងសង្គ្រាមលោកលើកទីពីរ។
ក្រោយសង្គ្រាម គាត់បានចំណាយពេល២៨ឆ្នាំ ធ្វើការជាមួយកុមារកំព្រា និងជនចាស់ជវានៅមន្ទីរពេទ្យមួយនៅតំបន់ Auvergne-Rhone-Alpes មុននឹងក្លាយជាដូនជីកាតូលិក។ លោកយាយចំណាយពេលវេលាដ៏យូរអង្វែងរបស់ខ្លួនក្នុងការងារសាសនា។
នាពេលថ្មីៗកន្លងមកនេះ Sister Andre ក៏ជាមនុស្សចាស់ជាងគេដែលបានជាសះស្បើយពីកូវីដ-១៩ផងដែរ ខណៈកាលពីអំឡុងឆ្នាំ១៩១៨ លោកយាយបានរស់នៅឆ្លងកាត់នឹងជំងឺផ្តាសាយអេស្ប៉ាញ។
១២ឆ្នាំមកហើយដែល Sister Andre បានរស់នៅក្នុងមណ្ឌលជនចូលនិវត្តន៍។ បច្ចុប្បន្នវ័យ១១៨ឆ្នាំ លោកយាយថ្លង់ពាក់កណ្តាល និងអង្គុយលើរទះ ប៉ុន្តែស្មារតីរបស់លោកយាយនៅតែដំណើរការប្រក្រតី។
លោកយាយ Tanaka ដែលជាម្ចាស់កំណត់ត្រាកន្លងមក បានទទួលមរណភាពនៅមន្ទីរពេទ្យក្នុងក្រុង Fukuoka កាលពីថ្ងៃទី១៩ ខែមេសា ឆ្នាំ២០២២ ក្នុងអាយុ១១៩ឆ្នាំ និង១០៧ថ្ងៃ។
សម្រាប់ម្ចាស់កំណត់ត្រាដែលមានអាយុច្រើនជាងគេលើពិភពលោក គឺស្ត្រីបារាំងឈ្មោះ Jeanne Louise Clament ដែលបានទទួលមរណភាពកាលពីឆ្នាំ១៩៩៧ ក្នុងអាយុ១២២ឆ្នាំ និង១៦៤ថ្ងៃ។ រីឯបុរសដែលមានអាយុវែងជាងគេគឺលោកតាជប៉ុន Jiroemon Kimura ដែលបានទទួលមរណភាពនៅឆ្នាំ២០១៣ក្នុងអាយុ១១៦ឆ្នាំ និង៥៤ថ្ងៃ៕
© រក្សាសិទ្ធិដោយ thmeythmey.com
