បើទោះបីជាខ្លួនមិនមែនជាសមាជិកនៃអង្គការសហប្រជាជាតិ (UN) តៃវ៉ា​ន់ជានិច្ចជាកាលតែងចូលរួមជួយប្រទេសផ្សេងៗ ដោយចង់បង្ហាញថា ខ្លួនមានការទទួលខុសត្រូវក្នុងសហគមន៍អន្តរជាតិ។ កន្លងមកតៃវ៉ាន់ ក៏ធ្លាប់ផ្តល់ជំនួយទៅអ៊ុយក្រែនដែរ។ 

 

ក្រោយអាហ្វហ្កានីស្ថានជួបគ្រោះរញ្ជួយដីនាពេលថ្មីៗនេះ ការិយាល័យប្រធានាធិបតីតៃវ៉ាន់ នៅយប់ថ្ងៃទី២៣ ខែមិថុនា បានលើកឡើងក្នុងសេចក្តីថ្លែងការណ៍មួយថា រដ្ឋាភិបាលតៃវ៉ាន់នឹងបរិច្ចាគជំនួយ ១​លានដុល្លារដល់អាហ្វហ្កានីស្ថាន ដោយផ្អែកលើស្មារតីមនុស្សធម៌។

 

យ៉ាងណាមិញ តៃវ៉ាន់នឹងមិនបញ្ជូនក្រុមស្វែងរក និងជួយសង្គ្រោះទៅអាហ្វហ្កានីស្ថានឡើយ បន្ទាប់ពីបានពិគ្រោះយោបល់ជាមួយប្រទេសផ្សេងទៀត និងពិចារណាពីការលំបាកក្នុងការដឹកជញ្ជូន។ នេះបើតាមអ្នកនាំពាក្យការិយាល័យប្រធានាធិបតីតៃវ៉ាន់ Xavier Chang។ 

 

ទន្ទឹមនេះ ចិនបានអះអាងថា ខ្លួនបានត្រៀមខ្លួនជាស្រេចក្នុងការផ្តល់ជំនួយដល់អាហ្វហ្កានីស្ថាន ដែលជាប្រទេសជិតខាង។ នៅថ្ងៃទី២៤ ខែមិថុនា ក្រសួងការបរទេសចិន បានបញ្ជាក់ថា ខ្លួនកំពុងបង្កើនកិច្ចខិតខំប្រឹងប្រែងដើម្បីប្រមូលសាច់ប្រាក់ តង់ ភួយ និងជំនួយមនុស្សធម៌ផ្សេងទៀត ប្រគល់ឱ្យអាហ្វហ្កានីស្ថាន ឆាប់បំផុតតាមដែលអាចធ្វើបាន។ ប៉ុន្តែ ក្រសួងការបរទេសចិនមិនបានផ្តល់ព័ត៌មានលម្អិតពីទំហំនៃកញ្ចប់ជំនួយ​ឡើយ។

 

គិតមកទល់ពេលនេះ មនុស្សជាង ១ពាន់នាក់ បានបាត់បង់ជីវិតក្នុងគ្រោះរញ្ជួយដីនៅអាហ្វហ្កានីស្ថាន ខណៈមនុស្សប្រមាណ ២ពាន់នាក់ផ្សេងទៀតរបួស៕