សុខភាព
អន្តរជាតិ
ការសិក្សា៖ ទទួលទានកាហ្វេមួយថ្ងៃពី ២ទៅ៣ពែង អាចកាត់បន្ថយហានិភ័យជំងឺក្រលៀន 26, Jun 2022 , 8:39 am
រូបភាព៖ Unsplash
× តាមការសិក្សាថ្មីមួយ ការទទួលទានកាហ្វេប្រចាំថ្ងៃពី ២ទៅ៣ពែង អាចកាត់បន្ថយហានិភ័យនៃជំងឺក្រលៀនបាន ២៣ភាគរយ។ ក្រុមអ្នកស្រាវជ្រាវ បានអះអាងថា ការទទួលទានកាហ្វេក្នុងបរិមាណប៉ុនណាក៏មានអត្ថប្រយោជន៍ចំពោះក្រលៀនដែរ តែការទទួលទានកាហ្វេត្រឹម ២ទៅ៣ពែងក្នុងមួយថ្ងៃគឺល្អបំផុត។ ទោះយ៉ាងណាក៏ដោយ ការសិក្សានេះមិនបានលើកទឹកចិត្តឱ្យអ្នកមិនចេះទទួលទានកាហ្វេជ្រើសយកការទទួលទានកាហ្វេ ដើម្បីកាត់បន្ថយហានិភ័យជំងឺក្រលៀនឡើយ ព្រោះកាហ្វេអាចបង្កផលរំខានដល់សុខភាពសម្រាប់មនុស្សមួយចំនួនដែរ។
កន្លងមក ការសិក្សាជាច្រើន បានរកឃើញពីអត្ថប្រយោជ៍នៃការទទួលទានកាហ្វេ ដូចជាការពារជំងឺមហារីក ជំងឺសរសៃឈាមបេះដូង ជំងឹទឺកនោមផ្អែម ជំងឺថ្លើម ជួយដល់ដំណើរការខួរក្បាល និងជួយឱ្យមានអាយុវែងថែមទៀត។ ថ្មីៗនេះ ការសិក្សាមួយចុះផ្សាយលើទិនានុប្បវត្តិ Kidney International Report បានបង្ហាញពីអត្ថប្រយោជន៍កាហ្វេថែមមួយមុខទៀត ទាក់ទងនឹងក្រលៀន។
ក្រុមអ្នកស្រាវជ្រាវ បានបង្ហាញថា អ្នកទទួលទានកាហ្វេមិនថាក្នុងបរិមាណប៉ុនណាក៏ដោយ សុទ្ធតែមានផលល្អដល់សុខភាពក្រលៀន ប៉ុន្តែការទទួលទានពី ២ទៅ៣ពែងក្នុងមួយថ្ងៃជាបរិមាណល្អបំផុត។ អ្នកទទួលទានកាហ្វេ ២ទៅ៣ពែងក្នុងមួយថ្ងៃអាចកាត់បន្ថយហានិភ័យនៃជំងឺក្រលៀន ២៣ភាគរយ។
ការអះអាងខាងលើធ្វើឡើងដោយផ្អែកលើការសិក្សាពីអ្នកចូលរួមជាង ១ម៉ឺននាក់មានអាយុចន្លោះពី ៤៥ ទៅ៦៥ឆ្នាំ។ ការសិក្សាបានធ្វើឡើងរយៈពេល ២៤ឆ្នាំ ដោយបានស្រង់មតិចំនួន៧ដងអំពីបរិមាណកាហ្វេដែលអ្នកចូលរួមបានទទួលទានប្រចាំថ្ងៃ។ ជាលទ្ធផល អ្នកដែលបានទទួលទានកាហ្វេបានកាត់បន្ថយហានិភ័យនៃការវិវដ្តទៅមានជំងឺក្រលៀនជាមធ្យម ១៥ភាគរយ ធៀបនឹងអ្នកដែលមិនទទួលទានកាហ្វេ។ ចំណែកអ្នកចូលរួមខ្លះមានជំងឺទាក់ទងនឹងជំងឺក្រលៀនដូចជាមានជំងឺលើសឈាម ជំងឺធាត់ និងទឹកនោមផ្អែមក្ដី ក៏នៅមានហានិភ័យវិវដ្តទៅមានជំងឺក្រលៀនទាបជាងអ្នកមិនទទួលទានកាហ្វេ ១១ភាគរយដែរ។
នេះទំនងជាមកពីសារជាតិកាហ្វេអ៊ីន ឬសារធាតុផ្សេងៗក្នុងកាហ្វេអាចជួយសម្រួលដំណើរអុកស៊ីសែនចូលក្នុងក្រលៀន ហើយអាចជួយសម្រួលមុខងារក្រលៀន។ យ៉ាងណាមិញ ការសិក្សាមិនទាន់អាចបកស្រាយពីមូលហេតុច្បាស់លាស់ឡើយ ថាតើហេតុអ្វីបានជាកាហ្វេអាចសម្រួលការបំពេញនាទីរបស់ក្រលៀនឡើយ។
គួរបញ្ជាក់ថា ការទទួលទានកាហ្វេគ្រប់ប្រភេទ មិនថាកាហ្វេបន្ថែមទឺកដោះគោ កាហ្វេដាក់ស្ករ បន្ថែមគ្រីម សុទ្ធតែមានទំនាក់ទំនងនឹងការកាត់បន្ថយហានិភ័យនៃជំងឺក្រលៀន។ លើសពីនេះ ការទទួលទានភេសជ្ជៈដទៃទៀតដែលមានជាតិកាហ្វេអ៊ីន ដូចជាតែ កាកាវ សូកូឡា ក៏ត្រូវបានរាប់បញ្ចូលថាមានអត្ថប្រយោជន៍ដល់សុខភាពក្រលៀនដែរ។ ទោះយ៉ាងណាក៏ដោយ ការសិក្សានេះមិនបានលើកទឹកចិត្តឱ្យអ្នកមិនចេះទទួលទានកាហ្វេជ្រើសយកការទទួលទានកាហ្វេ ដើម្បីកាត់បន្ថយហានិភ័យជំងឺក្រលៀនឡើយ ព្រោះកាហ្វេអាចបង្កផលរំខានដល់សុខភាពសម្រាប់មនុស្សមួយចំនួនដែរ៕
© រក្សាសិទ្ធិដោយ thmeythmey.com