សុខភាព
អន្តរជាតិ
WHO៖ ប្រជាជនពិភពលោកជិតមួយពាន់លាននាក់ មានបញ្ហាផ្លូវចិត្ត 26, Jun 2022 , 4:39 pm
រូបភាព៖ AFP
× តាមការលើកឡើងរបស់អង្គការសុខភាពពិភពលោក (WHO) ក្នុងឆ្នាំ ២០១៩ ប្រជាជនជិតមួយពាន់លាននាក់ នៅទូទាំងពិភពលោក បានរងគ្រោះដោយសារបញ្ហាផ្លូវចិត្តជាច្រើនប្រភេទ ហើយក្នុងនោះក៏មានក្មេងជំទង់ ១៤ភាគរយដែរ។ នេះជាទិន្នន័យចុងក្រោយបង្អស់ ដែលត្រូវបានផ្ដល់ដោយអង្គការសុខភាពពិភពលោក(WHO) និងជាតួលេខដ៏ធំគួរឱ្យព្រួយបារម្ភ។
បញ្ហាផ្លូវចិត្តត្រូវបានចែកចេញជាច្រើនប្រភេទ ប៉ុន្តែភាគច្រើនមនុស្សរងគ្រោះដោយប្រភេទជំងឺបាក់ទឹកចិត្ត និងជំងឺថប់អារម្មណ៍ដែលតែងធ្វើឱ្យមនុស្សមានអារម្មណ៍សោកសៅខ្លាំង ឬតែងភ័យព្រួយចំពោះរឿងគ្រប់យ៉ាង។ បញ្ហាវិសមភាពសង្គម សេដ្ឋកិច្ច សេវាសុខភាពសាធារណៈ វិបត្តិអាកាសធាតុ គឺសុទ្ធតែជាកត្តាគំរាមកំហែងដល់សុខភាពផ្លូវចិត្តរបស់ប្រជាជន។
ជាក់ស្ដែង ក្នុងឆ្នាំដំបូងនៃការរីករាលដាលជំងឺកូវីដ-១៩ អត្រាអ្នកមានបញ្ហាផ្លូវចិត្តដូចជា ជំងឺបាក់ទឹកចិត្ត និងជំងឺថប់អារម្មណ៍ បានកើនឡើង ២៥ភាគរយ។ ក្នុងឆ្នាំ ២០១៩ អ្នកមានបញ្ហាផ្លូវចិត្តទូទាំងសកលមានចំនួនជិត ១ពាន់លាននាក់ ដែលក្នុងនោះក្មេងជំទង់មាន ១៤ភាគរយដែរ។
មុនពេល និងអំឡុងពេលពិភពលោកជួបវិបត្តិកូវីដ-១៩ អ្នកមានបញ្ហាផ្លូវចិត្តមួយចំនួនតូចប៉ុណ្ណោះដែលមានលទ្ធភាពទទួលបានការព្យាបាលប្រកបដោយគុណភាព និងប្រសិទ្ធភាព។ អ្នកមានបញ្ហាផ្លូវចិត្តធ្ងន់ធ្ងរច្រើនជាង ៧០ភាគរយទូទាំងពិភពលោកមិនមានលទ្ធភាពទទួលបានការព្យាបាលបានត្រឹមត្រូវឡើយ។ នៅតាមបណ្ដាប្រទេសក្រីក្រ អ្នកមានលទ្ធភាពស្វែងរក និងទទួលបានការព្យាបាលបញ្ហាផ្លូវចិត្តមានតែ ១២ភាគរយប៉ុណ្ណោះ។ ហេតុនេះ ករណីអ្នកមានបញ្ហាផ្លូវចិត្តចេះតែបន្តកើនឡើងរហូតជិត មួយពាន់លាននាក់។
វាជាឧទាហរណ៍ល្អមួយដែលបង្ហាញថា ការផ្តល់សមភាពក្នុងសង្គមពិសេសទាក់ទិននឹងការផ្ដល់សេវាសុខភាពសាធារណៈដល់ប្រជាជនទាំងអស់គឺគួរតែត្រូវបានអនុវត្តឱ្យមានប្រសិទ្ធភាពតាមដែលអាចធ្វើទៅបាន ដើម្បីលើកកម្ពស់សុខភាពផ្លូវចិត្តរបស់ប្រជាជន។ សុខភាពផ្លូវចិត្តរបស់ប្រជាជនដើរតួយ៉ាងសំខាន់ក្នុងការអភិវឌ្ឍប្រទេសជាតិប្រកបដោយនិរន្តរភាព។
គួរបញ្ជាក់ថា អត្រាអ្នកមានបញ្ហាផ្លូវចិត្តជិត ១ពាន់លាននាក់ជាតួលេខដ៏ធំមួយដែលបានក្លាយជាក្ដីព្រួយបារម្ភរបស់ WHO។ អគ្គនាយក អង្គការWHO លោក Tedros Adhanom Ghebreyesus បានអំពាវនាវឱ្យប្រទេសទាំងអស់យកចិត្តទុកដាក់ការពារសុខភាពផ្លូវចិត្តប្រជាជន និងផ្ដល់សេវាថែទាំសាធារណៈតាមសហគមន៍ឱ្យបានល្អបំផុតតាមដែលអាចធ្វើបានដើម្បីសម្រេចគោលដៅសុខភាពសកលគ្មានបញ្ហាផ្លូវចិត្ត៕
© រក្សាសិទ្ធិដោយ thmeythmey.com