អន្តរជាតិ
ការសិក្សា៖ បម្រែបម្រួលអាកាសធាតុ កាន់តែធ្វើឱ្យអំពើហិង្សាលើស្ត្រីមានចំនួនច្រើនឡើង 26, Jun 2022 , 5:59 pm
រូបភាព៖ AFP
× ការសិក្សាថ្មីមួយបង្ហាញថា បម្រែបម្រួលអាកាសធាតុ បានបង្កឱ្យមានបញ្ហាគ្រោះធម្មជាតិយ៉ាងច្រើន ដែលជាកត្តាបង្កើនឱកាសប្រព្រឹត្តអំពើហិង្សាលើស្ត្រីកាន់តែធ្ងន់ធ្ងរ និងច្រើនឡើងដែរ។ ក្នុងស្ថានភាពមានគ្រោះធម្មជាតិផ្សេងៗ ករណីរំលោភ ការគំរាមកំហែងផ្លូវភេទ ការជួញដូរមនុស្ស ករណីបង្ខំឱ្យរៀបការទាំងវ័យក្មេង និងសកម្មភាពចាប់បង្ខំដទៃទៀត បានកើតឡើងលើស្ត្រី និងកុមារីជាច្រើន។
នៅពេលមនុស្សគិតអំពីផលប៉ះពាល់នៃបម្រែបម្រួលអាកាសធាតុ មនុស្សនឹកឃើញតែពីរូបភាពគ្រោះមហន្តរាយ ការខូចខាតទីក្រុង និងការឡើងកម្ដៅដែលប៉ះពាល់ដល់ជីវិតមនុស្សសត្វ។ ប៉ុន្តែ បម្រែបម្រួលអាកាសធាតុបានបង្កឱ្យមានបញ្ហាច្រើនជាងនេះទៅទៀតដែលកើតក្រោយគ្រោះមហន្តរាយទាំងនោះ។ ជាក់ស្ដែង បញ្ហាវិសមភាពយេនឌ័រ ដែលស្ត្រីត្រូវបានរងគ្រោះដោយការចាប់បង្ខំ និងអំពើហិង្សា។
ការពិត បញ្ហាបម្រែបម្រួលអាកាសធាតុបានបង្កផលប៉ះពាល់ដល់មនុស្ស និងសត្វទាំងអស់ក្នុងពិភពលោក។ យ៉ាងណាមិញ ស្ត្រី និងកុមារី ជាអ្នករងគ្រោះខ្លាំងជាងគេតាមរយៈសកម្មភាពចាប់បង្ខំផ្សេងៗ ដែលបង្កឱ្យមានការប្រព្រឹត្តិអំពើហិង្សាលើរាងកាយ ផ្លូវចិត្ត និងផ្លូវភេទជាដើម។ នៅពេលមានបញ្ហាគ្រោះធម្មជាតិ បញ្ហាអសន្តិសុខក៏កើតឡើង ស្របគ្នាដែរ ដែលជាហេតុធ្វើឱ្យករណីអំពើហិង្សាលើមនុស្សស្រីកាន់តែធ្ងន់ធ្ងរ។
ការសិក្សាស្រាវជ្រាវថ្មីមួយចុះផ្សាយលើទិនានុប្បវត្តិ The Lancet Planetary Health បានបង្ហាញថាករណីអំពើហិង្សាលើស្ត្រី និងក្មេងស្រីកើនឡើងជាលំដាប់ បន្ទាប់ពីមានគ្រោះទឹកជំនន់ គ្រោះរាំងស្ងួត ខ្យល់ព្យុះ និងព្រឹត្តិការណ៍គ្រោះមហន្តរាយផ្សេងៗទៀតដែលកើតឡើងដោយសារការកើនឡើងកម្ដៅផែនដី។ នេះដោយសារស្របពេលពិភពលោកជួបបញ្ហាធម្មជាតិនោះ បញ្ហាសេដ្ឋកិច្ច ក៏ដូចជាបញ្ហាអសន្តិសុខសង្គមក៏កើតមានឡើងដែលបង្កឱ្យស្ត្រីត្រូវរងគ្រោះដោយអំពើហិង្សាផ្លូវភេទ ការជួញដូរមនុស្ស ការបង្ខំឱ្យរៀបការទាំងវ័យក្មេង និងការបង្ខិតបង្ខំក្នុងរូបភាពផ្សេងៗ។
ជាក់ស្ដែង អំពើហិង្សាលើស្ត្រីត្រូវបានកើតឡើងក្នុងរូបភាពដូចជា ពេលមានគ្រោះធម្មជាតិ វាបានរំខានដល់ចំណូលគ្រួសារ ហើយវាក៏រំខានដល់ការសិក្សារបស់ក្មេងស្រី។ ដូច្នេះគ្រួសារដែលមានកូនស្រីភាគច្រើន បង្ខំឱ្យកូនស្រីរៀបការ ឬឈប់រៀនដើម្បីរកចំណូលជួយគ្រួសារ។ មួយវិញទៀត នៅពេលមានគ្រោះធម្មជាតិ ប្រជាជនត្រូវជម្លៀសទៅនៅក្នុងជំរំរស់នៅជម្រុះគ្នារវាងក្មេងប្រុសនិងក្មេងស្រី។ ហេតុនេះ ករណីរំលោភនិងអំពើហិង្សាផ្លូវភេទក៏ងាយកើតឡើងដែរ។
គួរបញ្ជាក់ថា បញ្ហាហិង្សាលើស្ត្រី និងកុមារីដែលបណ្ដាលមកពីបម្រែបម្រួលអាកាសធាតុ កើតឡើងនៅគ្រប់ទីកន្លែង តែភាគច្រើនកើតឡើងនៅបណ្ដាប្រទេសក្រីក្រដែលតែងរងគ្រោះខ្លាំងពីគ្រោះមហន្តរាយ។ អំពើហិង្សាលើស្ត្រីកើតឡើងគ្រប់ពេល និងបន្តកើនឡើងឥតឈប់ឈរ។ ដូច្នេះពិភពលោកត្រូវយកចិត្តទុកដាក់ ការពារ និងបន្តដោះស្រាយតាមគ្រប់វិធី រួមទាំងទប់ស្កាត់បម្រែបម្រួលអាកាសធាតុដែលជាក្ដីបារម្ភដ៏ធំរបស់សកល៕
Tag:
ហិង្សា
បម្រែបម្រួលអាកាសធាតុ
© រក្សាសិទ្ធិដោយ thmeythmey.com