កីឡាអន្តរជាតិ
អន្តរជាតិ
ប្រធាន WWE ប្រកាសចូលនិវត្តន៍ ក្រោយមានការស៊ើបអង្កេតអំពីការប្រព្រឹត្តខុសច្បាប់ 23, Jul 2022 , 10:19 pm
× ប្រធានស្ថាប័នការកំសាន្តកីឡាចំបាប់ពិភពលោក (WWE) លោក Vince McMahon ថ្ងៃទី២២ ខែកក្កដា បានប្រកាសចូលនិវត្តន៍ពីតួនាទី ប្រធានក្រុមហ៊ុន និងនាយកប្រតិបត្តិ ក្រោយរងការចោទថា បានប្រព្រឹត្តអំពើខុសច្បាប់។
បើតាមរបាយការណ៍កាសែត
Wall Street Journal លោក McMahon វ័យ ៧៦ឆ្នាំ ត្រូវបានក្រុមប្រឹក្សាស្ថាប័ន WWE ស៊ើបអង្កេតលើរឿង បានចំណាយប្រាក់ប្រមាណជាង ១២លានដុល្លារក្នុងរយៈពេល ១៦ឆ្នាំចុងក្រោយ ដើម្បីបិទបាំងការប្រព្រឹត្តខុសច្បាប់លើរឿងផ្លូវភេទ និងភាពមិនស្មោះត្រង់ជាមួយក្រុមហ៊ុន។
លោក Vince McMahon កាន់កាប់តំណែងនៅពីក្រោយស្ថាប័នកំសាន្តដ៏ធំប្រចាំពិភពលោកមួយនេះ ចាប់តាំងពីឆ្នាំ ១៩៨០ ក្រោយពេលលោកបានបញ្ចប់អាជីពជាកីឡាករចំបាប់ក្នុងស្ថាប័នមួយនេះមក។ WWE បានប្រែក្លាយពីក្រុមហ៊ុនឧស្សាហកម្មកម្មវិធីកំសាន្តក្នុងស្រុកមួយ ទៅជាក្រុមហ៊ុនកម្មវិធីកំសាន្តបែបកីឡាចំបាប់ធំបំផុតលំដាប់ទីមួយលើសកលលោក ដែលមានចំណូលទំហំទឹកប្រាក់ប្រមាណ ១ពាន់លានដុល្លារត្រឹមឆ្នាំ ២០២១។
រឿងរ៉ាវរបស់លោក McMahon បានក្លាយជាអត្ថបទដ៏ក្តៅបំផុតមួយប្រចាំបណ្តាញសង្គម Twitter នៅអាម៉េរិក ដោយមានអ្នកគាំទ្រស្ថាប័ន WWE រាប់ពាន់នាក់មានការភ្ញាក់ផ្អើលចំពោះការប្រកាសចូលនិវត្តន៍មួយនេះ។
តាមសេចក្តីថ្លែងការណ៍មួយថ្ងៃទី ២២ ខែកក្កដា លោក McMahon បានប្រកាសចូលនិវត្តន៍ពីស្ថាប័ន WWE ក្នុងនាមជាប្រធានក្រុមហ៊ុន និងនាយកប្រតិបត្តិ ដោយលោកនិយាយថានឹងបន្តជួយគាំទ្រស្ថាប័នកំសាន្តដ៏ធំរបស់អាម៉េរិកមួយនេះក្នុងនាមជាម្ចាស់ភាគហ៊ុនមួយរូប។
«ទស្សនិកជនទូទាំងសកលលោករបស់យើង នឹងអាចបន្តទទួលបានការទស្សនាកម្មវិធីកំសាន្តរបស់យើងបន្តទៀត ដោយ WWE នឹងបន្តផលិតកម្មវិធីកំសាន្តបែបនេះដដែលទៅមុខទៀត ជាមួយការលះបង់ និងចំណូលចិត្តរបស់អ្នកគាំទ្រគ្រប់រូប។ ក្នុងនាមជាចំណែកមួយនៃម្ចាស់ភាគហ៊ុន ខ្ញុំនឹងបន្តជួយគាំទ្រ WWE ទៅតាមអ្វីដែលខ្ញុំអាចធ្វើទៅបាន។»។ លោក McMahon និយាយបែបនេះ។
WWE បានរៀបចំជាកម្មវិធីប្រកួតធំៗប្រចាំខែនានា និងព្រឹត្តិការណ៍ប្រកួតធំបំផុតដែល WWE មានជាងរយៈពេល ៣០ឆ្នាំមកនេះគឺព្រឹត្តិការណ៍ WrestleMania។
រៀងរាល់សប្តាហ៍ស្ថាប័ន WWE ក៏បានផលិតកម្មវីធីកីឡាចំបាប់នេះ ដោយបែងចែកជាពីស្ថាប័នតូចៗចំនួនពីររួមមាន RAW និង Smackdown ដែលមានកូនស្រីរបស់លោក McMahon គឺអ្នកស្រី Stephanie McMahon ជានាយកប្រតិបត្តិគ្រប់គ្រងបណ្តោះអាសន្នជាអ្នកមើលការខុសត្រូវតាំងពីខែមិថុនាមក៕
© រក្សាសិទ្ធិដោយ thmeythmey.com