ព្រឹត្តិការណ៍កីឡាអូឡាំពិករដូវក្តៅទីក្រុងប៉ារីស នឹងធ្វើឡើងចាប់ពីថ្ងៃទី ២៦ ខែកក្កដា រហូតដល់ថ្ងៃទី ១១ខែសីហា ឆ្នាំ ២០២៤។ កីឡាអូឡាំពិកបានក្លាយជាបញ្ហាចំណុចរួមមួយ សម្រាប់រដ្ឋាភិបាលបារាំង ដែលចង់ឱ្យព្រឹត្តិការណ៍កីឡាដ៏ធំលំដាប់ថ្នាក់ពិភពលោកមួយនេះ មានភាពទំនើប ផាសុខភាព សុវត្ថិភាព ព្រមទាំងបើកចំហចំពោះពិភពលោក។
 

រយៈពេលត្រឹមតែ២ឆ្នាំទៀតប៉ុណ្ណោះ ដែលព្រឹត្តិការណ៍ត្រូវចាប់ផ្តើមឡើង ប៉ុន្តែបញ្ហាប្រឈមផ្សេងៗក៏បានកើតឡើងសម្រាប់បារាំងដែរ។ មិនត្រឹមតែការចំណាយលើការរៀបចំនោះទេ តែក៏មានការព្រួយបារម្ភខ្លាំងអំពីរឿងរៀបចំសុវត្ថិភាពសណ្តាប់ធ្នាប់ ក៏ជារឿងចម្បងផងដែរ។
 

កាលពីខែឧសភា កេរិ៍្តឈ្មោះប្រទេសបារាំងក្នុងនាមជាម្ចាស់ផ្ទះមួយ ដែលគួរឱ្យទុកចិត្តបំផុត បានរងភាពអាម៉ាស់ជាខ្លាំង អំឡុងពេលព្រឹត្តិការណ៍ UEFA Champions League រវាងក្រុម Liverpool ទល់ Real Madrid ក្រោយមានការប៉ះទង្គិចរវាងអ្នកគាំទ្រ Liverpool ជាមួយមន្ត្រីប៉ូលីស។ ប្រទេសបារាំងរងការរិះគន់ថា បានប្រើប្រាស់កម្លាំងអាជ្ញាធរធ្ងន់ធ្ងរលើអ្នកគាំទ្រ។
 

«នេះជា​ឱកាសសម្រាប់រដ្ឋមន្ត្រីនានា ក្នុងការកត់សំគាល់ថា កន្លែងណាដែលជាចំណុចខ្សោយ ហើយគំនិតជាច្រើននឹងត្រូវបានបញ្ចេញ នឹងត្រូវដឹងពីពេលវេលាសម្រាប់ជំហ៊ានបន្តបន្ទាប។»នេះបើតាមមន្ត្រីស្និទប្រធានាធិបតីបារាំងម្នាក់ ដែលសុំមិនបញ្ចេញឈ្មោះ។
 

កិច្ចប្រជុំនាវិមានអ៊ីលីស៊ី (Elysee) មានការចូលរួមពីសំណាក់រដ្ឋមន្រ្តីសំខាន់ៗដូចជា រដ្ឋមន្ត្រីក្រសួងមហាផ្ទៃបារាំងលោក Gerald Darmanin និងរដ្ឋមន្រ្តីក្រសួងកីឡាអ្នកស្រី Amelie Oudea-Castera។ 
 

នាកិច្ចប្រជុំនោះទៀតសោត ប្រធានបទស្តីពីការព្រួយបារម្ភលើកត្តាសុវត្ថិភាព ជាពិសេសលើចក្ខុវិស័យសម្រាប់ព្រឹត្តិការណ៍អូឡាំពិកនឹងត្រូវបានយកមកពិភាក្សា ។ មិនត្រឹមប៉ុណ្ណោះក៏មានពិភាក្សាអំពី ការរៀបចំកម្មវិធីបើកនៅតាមតំបន់ដងទន្លេ Seine ដែលផ្លាស់ពីការរៀបចំកម្មវិធីនៅតាមកីឡដ្ឋានផងដែរ៕