«វាមានតែចំណេញ វាអត់មានអីខាតទេ អ្នកឯងចេះបារាំង អង់គ្លេស ឬភាសាអ្វីក៏ដោយ គឺអត់មានអីខាតទេ។ រឿងអីបានជានាំគ្នាជ្រួលច្របល់?»។ នេះជាការចោទសួររបស់សម្តេចនាយករដ្ឋមន្ត្រី ដោយសម្តែងការហួសចិត្តចំពោះការលើកឡើងថា ការបង្កើតដេប៉ាតឺម៉ង់វៀតណាម នឹងបង្កើតបញ្ហាកម្ពុជាក្រោមទីពីរ។

 

សម្តេច ហ៊ុន សែន បានបញ្ជាក់ថា ដេប៉ាតឺម៉ង់វៀតណាម មិនយកនិស្សិតវៀតណាមមកបង្រៀនវៀតណាមនៅខ្មែរនោះឡើយ។ «ផលចំណេញគឺខ្មែរយើងទេ ហេតុអ្វីបានថា ផលចំណេញ បើយើងបានបណ្តុះបណ្តាលនៅទីនេះ រួចហើយយើងបញ្ជូនចេញទៅ  គឺងាយស្រួលទាំងកងទ័ព ទាំងនគរបាល ទាំងផ្នែកស៊ីវិល»។

  :

បច្ចុប្បន្ននិស្សិតខ្មែរកំពុងរៀននៅវៀតណាមជាង១០០០នាក់ ដូចគ្នាផងដែរ និស្សិតពីបណ្តាប្រទេសផ្សេងទៀត ក៏ពួកគេត្រូវឲ្យនិស្សិតរៀនភាសាខ្មែរផងដែរ មុននឹងមករៀននៅខ្មែរ។

 

ប្រមុខរដ្ឋាភិបាល បានលើកឡើងថា ការរៀនភាសាវៀតណាម ផ្តល់ភាពងាយស្រួលសម្រាប់អ្នកចង់ធ្វើធុរកិច្ចជាមួយវៀតណាម រីឯអ្នកដែលចង់រកស៊ីជាមួយវៀតណាម ក៏អាចបញ្ជូនកូនចៅរបស់ខ្លួនទៅរៀននៅដេប៉ាតឺម៉ង់វៀតណាមផងដែរ៕