អន្តរជាតិ
នយោបាយអន្តរជាតិ
កូរ៉េខាងជើងរិះគន់អ្នកជំនាញសិទ្ធិមនុស្ស UN ថ្មីថាលម្អៀង និងជាអាយ៉ងរបស់អាម៉េរិក 02, Sep 2022 , 11:18 am
× ក្រសួងការបរទេសកូរ៉េខាងជើង បានរិះគន់អ្នកជំនាញផ្នែកសិទ្ធិមនុស្សរបស់អង្គការសហប្រជាជាតិ (UN) ថា ជាមនុស្សលម្អៀង និងជាអាយ៉ងអាម៉េរិក។ នេះបើតាមទីភ្នាក់ងារព័ត៌មានមជ្ឈិមកូរ៉េខាងជើង (KCNA) នៅថ្ងៃទី២ ខែកញ្ញា។
អ្នកជំនាញទទួលបន្ទុកផ្នែកសិទ្ធិមនុស្សនៅកូរ៉េខាងជើងលោកស្រី Elizabeth Salmon កំពុងស្ថិតក្នុងដំណើរទស្សនកិច្ចជាផ្លូវការលើកដំបូងទៅកូរ៉េខាងត្បូងចាប់តាំងពីចូលកាន់តំណែងកាលពីខែសីហា។ នៅក្នុងសេចក្តីថ្លែងការណ៍មួយលោកស្រី Salmon បានអះអាងថា ស្ថានភាពសិទ្ធិមនុស្សរបស់កូរ៉េខាងជើងកាន់តែអាក្រក់ទៅៗ បន្ទាប់ពីមានវិធានការដ៏តឹងរ៉ឹងជាងពីរឆ្នាំដើម្បីទប់ស្កាត់ការរីករាលដាលជំងឺកូវីដ-១៩។
ដូចរាល់ដង ទីក្រុងព្យុងយ៉ាងបានច្រានចោលការចោទពីការរំលោភសិទ្ធិមនុស្ស និងបានរិះគន់ការស៊ើបអង្កេតរបស់ UN លើបញ្ហានេះថា ជាគម្រោងដែលគាំទ្រដោយអាម៉េរិក ដើម្បីជ្រៀតជ្រែកកិច្ចការផ្ទៃក្នុងរបស់ខ្លួនប៉ុណ្ណោះ។
«ពួកយើងបានបញ្ជាក់យ៉ាងច្បាស់អំពីគោលជំហរជាគោលការណ៍របស់យើងថា ពួកយើងមិនទទួលស្គាល់ ឬជជែកជាមួយអ្នករាយការណ៍ពិសេសដែលគ្រាន់តែជាអាយ៉ងរបស់អាម៉េរិកប៉ុណ្ណោះ»។ ប្រព័ន្ធផ្សព្វផ្សាយរដ្ឋកូរ៉េខាងជើង KCNA បានស្រង់សម្ដីអ្នកនាំពាក្យក្រសួងការបរទេសកូរ៉េខាងជើងមួយរូបបែបនេះ។
អ្នកនាំពាក្យរូបនោះក៏បានបន្តថា ទីក្រុងព្យុងយ៉ាងនឹងមិនលើកលែងឱ្យអាម៉េរិក និងក្រុមសិទ្ធិមនុស្សរបស់អាម៉េរិកដែលតែងតែប្រឆាំងនឹងកូរ៉េខាងជើងដើម្បីផ្ដួលរំលំប្រព័ន្ធសង្គមនិយមរបស់ប្រទេសមួយនេះឡើយ។
គួរបញ្ជាក់ថា របាយការណ៍របស់ UN ថ្មីៗនេះ បានសង្កត់ធ្ងន់ពីវិធានការទប់ស្កាត់ជំងឺកូវីដ-១៩ របស់កូរ៉េខាងជើងដែលបានធ្វើឱ្យការរំលោភសិទ្ធិមនុស្សរបស់ប្រទេសនេះកាន់តែធ្ងន់ធ្ងរឡើង។ បើតាម UN កូរ៉េខាងជើង បានរឹតត្បិតបន្ថែមលើប្រជាជនក្នុងការទទួលបានព័ត៌មាន រឹតបន្តឹងព្រំដែនសន្តិសុខព្រំដែន និងការឃ្លាំមើលតាមប្រព័ន្ធឌីជីថល៕
© រក្សាសិទ្ធិដោយ thmeythmey.com