អន្តរជាតិ
នាយករដ្ឋមន្ត្រីតៃវ៉ាន់ ថា ការបាញ់ទម្លាក់ដ្រូនមិនស្គាល់អត្តសញ្ញាណក្បែរឆ្នេរចិន ជារឿងត្រឹមត្រូវ 02, Sep 2022 , 2:00 pm
ទិដ្ឋភាពចម្រូងលើកោះ Kinmen ដែលនៅមិនឆ្ងាយពីទីក្រុង Xiamen របស់ចិន។ រូបថត AFP
× នាយករដ្ឋមន្ត្រីកោះតៃវ៉ាន់ Su Tseng-chang លើកឡើងនៅថ្ងៃទី២ ខែកញ្ញា ថា ការបាញ់ទម្លាក់ដ្រូនមិនស្គាល់អត្តសញ្ញាណមួយក្បែរឆ្នេរសមុទ្រចិន ជាចំណាត់ការសមស្របបំផុតបន្ទាប់ពីបានព្រមានជាច្រើនលើកមកហើយ។
ជាលើកដំបូងបង្អស់ យោធាកោះតៃវ៉ាន់បានបាញ់ទម្លាក់ដ្រូនស៊ីវិលដែលមិនត្រូវបានស្គាល់ អត្តសញ្ញាណ ខណៈដែលដ្រូននោះបានហោះចូលជិតដែនអាកាសនៃកោះ Kinmen ដែលតៃវ៉ាន់គ្រប់គ្រង ហើយស្ថិតនៅជាប់នឹងទីក្រុង Xiamen របស់ចិនកាលពីថ្ងៃទី១ ខែកញ្ញា។
ការបាញ់ទម្លាក់នេះបានកើតឡើងក្រោយរដ្ឋាភិបាលក្រុងតៃប៉ិបានសន្យាថា នឹងចាត់វិធានការដ៏តឹងរ៉ឹងបំផុតដើម្បីដោះស្រាយជាមួយការកើនឡើងនៃការឈ្លានពានដែនអាកាសនិងដែនទឹកពីសំណាក់ចិន។ ថ្មីៗនេះកោះតៃវ៉ាន់ក៏បានត្អូញត្អែរម្តងហើយម្តងទៀតអំពីការយាយីដោយដ្រូនចិនដែលបានហោះហើរត្រង់ទៅជិតកោះ Kinmen ។
ថ្លែងទៅកាន់អ្នកសារព័ត៌មាននៅថ្ងៃទី២ ខែកញ្ញា លោក Su Tseng-cheng បានបញ្ជាក់ជាថ្មីថា តៃវ៉ាន់បានចេញការព្រមានដដែលៗ ហើយក៏បានស្នើឱ្យចិនកុំឱ្យទៅទន្ទ្រានជិតដែនអាកាសរបស់ខ្លួន។
«ពួកគេបានព្រងើយកន្តើយនឹងការព្រមានរបស់យើងម្តងហើយម្តងទៀតក្នុងការចាកចេញឱ្យឆ្ងាយ ហើយយើងគ្មានជម្រើសអ្វីក្រៅពីចាត់វិធានការការពារខ្លួន និងការបាញ់»។ លោក Su លើកឡើងបែបនេះ រួចសង្កត់ធ្ងន់ថា វិធានការនេះជាប្រតិកម្មសមស្របបំផុតបន្ទាប់ពីមានការអត់ធ្មត់ និងការព្រមានម្តងហើយម្តងទៀត។
នៅថ្ងៃដែលដ្រូននោះត្រូវបានបាញ់ទម្លាក់ ក្រសួងការបរទេសចិនឯណោះ បញ្ជាក់ថា ក្រុងប៉េកាំង មិនមានអ្វីដែលគួរឱ្យបារម្ភពីរឿងនេះនោះឡើយ។
គួរបញ្ជាក់ថា កោះតៃវ៉ាន់បានគ្រប់គ្រងកោះ Kinmen ដែលស្ថិតនៅចម្ងាយតែពីរទៅបីរយម៉ែត្រពីឆ្នេរសមុទ្រចិនតាំងពីសង្គ្រាមស៊ីវិលក្នុងឆ្នាំ១៩៤៩។ ក្នុងអំឡុងសង្គ្រាមត្រជាក់ ចិនតែងតែបាញ់ផ្លោងលើកោះ Kinmen និងកោះដែលគ្រប់គ្រងដោយតៃវ៉ាន់ផ្សេងទៀតនៅតាមឆ្នេរសមុទ្រចិន ប៉ុន្តែឥឡូវនេះកោះទាំងនោះបានក្លាយជាគោលដៅទេសចរណ៍៕
© រក្សាសិទ្ធិដោយ thmeythmey.com