ជាតិ
រថយន្ត
Volkswagen ប្រភេទទី១ ជារថយន្តបុរាណដែលនៅសេសសល់ច្រើនជាងគេនៅកម្ពុជា 05, Sep 2022 , 7:59 pm
× ភ្នំពេញ៖ រថយន្ដម៉ាក VOLKSWAGEN ប្រភេទទី១ ផលិតឆ្នាំ១៩៦៦ ចំនួន១គ្រឿង ត្រូវបានតាំងលម្អនៅភូមិគ្រឹះមួយកន្លែង ស្ថិតក្នុងសង្កាត់ព្រែកលាប ខណ្ឌជ្រោយចង្វារ រាជធានីភ្នំពេញ។ វាចូលពីសហរដ្ឋអាម៉េរិក និងនៅបំពាក់ផ្លាកលេខអាម៉េរិកនៅឡើយ ក៏ប៉ុន្តែនៅពេលឥឡូវនេះ វាជិះមិនបាន ដោយកង្វះការប្រើ និងការថែទាំ។ វាខូចច្រើនពិតមែន ក៏ប៉ុន្តែគ្រឿងស្ទើរតែទាំងអស់ ជាគ្រឿងដើម ហើយថ្នាំពណ៌ស ក៏ជាពណ៌ពីដើមដែរ។ ក្រៅពី VOLKSWAGEN ទាំង២គ្រឿងនេះ ក៏មានបុរាណ ៤គ្រឿងទៀតដែរ ដែលជាឡានបារាំង ម៉ាក RENAULT និង CITROËN និង MERCEDES-BENZ ពីជំនាន់ផ្សេងៗ និងត្រូវបានផលិតពីប្រហែលឆ្នាំ១៩២២ ដល់ឆ្នាំ១៩៧០។ ក្នុងចំណោមនោះ មាន៣គ្រឿងជាម៉ាក។
សូមទស្សនាវីដេអូខាងក្រោមនេះ៖
នៅទូទាំងពិភពលោក VOLKSWAGEN ប្រភេទទី១ នៅសេសសល់ច្រើន។ ដូច្នេះក្នុងចំណោមឡានបុរាណ ដែលត្រូវនាំចូលមកប្រទេសកម្ពុជា ច្រើនជា VOLKSWAGEN ប្រភេទទី១ដែរ។ រថយន្ដ VOLKSWAGEN ប្រភេទនេះមានឈ្មោះផ្លូវការ ថាប្រភេទទី១ ពីព្រោះជាប្រភេទដំបូងគេបង្អស់ ដែលក្រុមហ៊ុន VOLKSWAGEN បានផលិត។ ក៏ប៉ុន្តែគ្មាននរណាហៅវាដូចនេះទេ! ប្លែកមែន តាមភាសានីមួយៗរថយន្ដនេះ មានឈ្មោះហៅថា Käfer (ភាសាអាល្លឺម៉ង់) Coccinelle (ភាសាបារាំង) Escarabajo (ភាសាអេស្ប៉ាញ) Beetle (ភាសាអង់គ្លេស)លឺ Kever (ភាសាហូឡង់) Maggiolino (ជាភាសាអ៊ីតាលី) Fusca (ភាសាព័រទុយហ្កាល) Garbus (ភាសាប៉ូឡូញ)។ ល។ ដែលអាចបកប្រែថា សត្វខ្ញុង ពីព្រោះវាមានរាងដូចសត្វល្អិតនេះ។ ជាភាសាខ្មែរវិញ ចាស់ៗហៅថា ឡានអណ្ដើក។ បុរាណក៏ដោយ ទូទាំងពិភពលោក មិនមែនជាប្រភេទរថយន្ដកម្រមានទេ ពីព្រោះគឺជាប្រភេទរថយន្ដ ដែលត្រូវបានផលិតយូរជាងគេបំផុត : ពីឆ្នាំ១៩៣៨ ដល់ឆ្នាំ២០១៩។ តាមពិតនៅទ្វីបអឺរ៉ុប ត្រូវបានឈប់ផលិតត្រឹមឆ្នាំ១៩៧៨។ ក្រៅពីនេះ ត្រូវបានបន្តផលិតរហូតដល់ឆ្នាំ២០០៣។ បន្ទាប់មក ត្រូវផលិតជំនាន់ចុងក្រោយមួយទៀត ក្នុងរោងចក្រមួយគត់ ស្ថិតនៅអាម៉េរិកឡាទីន រហូតដល់ឆ្នាំ២០១៩។
VOLKSWAGEN ប្រភេទទី១ ត្រូវបានដំឡើងប្រមាណ ២១លានគ្រឿង តាមរោងចក្រផ្សេងៗនៅប្រទេសអាល្លឺម៉ង់ ហើយនៅប្រទេសនានា ក្នុងទ្វីបអឺរ៉ុប ទ្វីបអាហ្វ្រិក និងទ្វីបអាម៉េរិក តែមិនមែននៅទ្វីបអាស៊ីយើងទេ។ ហេតុនេះហើយ រថយន្ដនេះ នៅទ្វីបអាស៊ីមិនមែនពេញនិយម ដូចនៅទ្វីបដទៃទៀតទេ។ មុនសង្គ្រាមនៅប្រទេសកម្ពុជា មានឡាន VOLKSWAGEN ប្រភេទទី១ ច្រើនគួរសម។ ប៉ុន្តែសូមបញ្ជាក់ថា សព្វថ្ងៃ នៅរាជធានីភ្នំពេញមាន VOLKSWAGEN ប្រភេទទី១ ពី៥ ទៅ ៦គ្រឿង នៅក្រុងសៀមរាបមាន ៥ ទៅ ៦គ្រឿង នៅខេត្តកំពង់ឆ្នាំង ស្រុករលាប្អៀរមាន ១គ្រឿង នៅក្រុងពោធិ៍សាត់មាន ១គ្រឿង នៅក្រុងបាត់ដំបងមាន ២គ្រឿង និងនៅខេត្តកណ្ដាលមាន ៣គ្រឿង។
ម៉ាក VOLKSWAGEN ត្រូវបានបង្កើតឡើងនៅប្រទេសអាល្លឺម៉ង់ នៅអំឡុងឆ្នាំ១៩៣៧ ដោយពលរដ្ឋអូទ្រីសមួយរូបឈ្មោះ PORSCHE Ferdinand ដែលក៏បានបង្កើតម៉ាក PORSCHE ដែរ។ ជាភាសាអាល្លឺម៉ង់ពាក្យ VOLKS មានន័យថា ប្រជាជន និងពាក្យ WAGEN មានន័យថាឡាន៕
Tag:
យានយន្ត
រថយន្ត
ឡានបុរាណ
Volkswagen
© រក្សាសិទ្ធិដោយ thmeythmey.com