អន្តរជាតិ
នយោបាយអន្តរជាតិ
នាវាដឹកយន្តហោះចម្បាំងអាម៉េរិក នឹងទៅកូរ៉េខាងត្បូងជាលើកទីមួយតាំងពីឆ្នាំ២០១៨ 20, Sep 2022 , 9:59 am
នាវាដឹកយន្តហោះចម្បាំង USS Ronald Reagan ក្នុងប្រតិបត្តិការកន្លងមក។ រូបថត៖ កងទ័ពជើងទឹកអាម៉រិក
× នាវាដឹកយន្តហោះចម្បាំងអាម៉េរិក នឹងធ្វើដំណើរទៅកាន់កូរ៉េខាងត្បូងក្នុងសប្ដាហ៍នេះដើម្បីធ្វើសមយុទ្ធយោធារួមគ្នាមួយ។ នេះជាលើកដំបូងក្នុងរយៈពេល៤ឆ្នាំដែលអាម៉េរិកបញ្ជូននាវដឹកយន្តហោះទៅឧបទ្វីបកូរ៉េ។
បើតាមការប្រកាសរបស់កងទ័ពកូរ៉េខាងត្បូង ក្រុមនាវាដឹកយន្តហោះចម្បាំង USS Ronald Reagan នឹងធ្វើដំណើរទៅដល់មូលដ្ឋានទ័ពជើងទឹកមួយនៅទីក្រុងកំពង់ផែភាគខាងត្បូងទីក្រុង Busan នៅថ្ងៃទី២៣ ខែកញ្ញា ដើម្បីចូលរួមលំហាត់យោធារួមគ្នា។
«តាមរយៈការធ្វើសមយុទ្ធរួមគ្នា កងទ័ពជើងទឹកនៃប្រទេសទាំងពីរគ្រោងនឹងពង្រឹងការត្រៀម លក្ខណៈយោធារបស់ខ្លួន និងដើម្បីបង្ហាញពីការតាំងចិត្តដ៏ម៉ឺងម៉ាត់របស់កូរ៉េខាងត្បូង និងអាម៉េរិកសម្រាប់សន្តិភាព និងស្ថិរភាពនៅឧបទ្វីបកូរ៉េ»។ សេចក្ដីថ្លែងការណ៍ខាងលើក៏បានបញ្ជាក់បែបនេះ។
ក្រៅពីនាវាដឹកយន្តហោះ USS Ronald Reagan ប្រភេទ Nimitz Class ក្រុមនាវានេះមានចម្បងនាវាផ្សេងទៀតដូចជានាវាពិឃាត USS Chancellorsville និងនាវាពិឃាត USS Barry Aegis។
ការសម្រេចធ្វើសមយុទ្ធយោធានេះបានធ្វើឡើងបន្ទាប់ពីក្រុងវ៉ាស៊ីនតោន និងក្រុងសេអ៊ូលបានព្រមព្រៀងគ្នាលើការប្តេជ្ញា ចិត្តក្នុងការដាក់ពង្រាយកម្លាំងយោធាជាយុទ្ធសាស្ត្រឱ្យទាន់ពេលវេលាដើម្បីឆ្លើយតបនឹងការគំរាមកំហែងរបស់ក្រុងព្យុងយ៉ាង។
គួរបញ្ជាក់ថា ក្រុមនាវាផ្ទុកយន្តហោះនេះបានធ្វើសមយុទ្ធរួមគ្នាចុងក្រោយបង្អស់ជាមួយកូរ៉េ ខាងត្បូងតាំងពីខែកញ្ញាឆ្នាំ២០១៨ គឺនៅពេលដែលស្ថានភាពតានតឹងតែងដោយសារតែកូរ៉េខាងជើងបានតេស្តមីស៊ីលជាច្រើនលើកច្រើនសារ៕
Tag:
កូរ៉េខាងត្បូង
អាម៉េរិក
© រក្សាសិទ្ធិដោយ thmeythmey.com