តាមទំព័រហ្វេសប៊ុករបស់សម្តេចនាយករដ្ឋមន្ត្រីកម្ពុជា ដំណឹងពីសមាជិកភាពអាស៊ាន បានធ្វើឲ្យប្រធានាធិបតីប្រទេសទីម័រខាងកើតលោក រ៉ាម៉ូស ហ័រតា និងគណៈប្រតិភូ រំភើប និងបានអរគុណសម្តេច ហ៊ុន សែន ចំពោះកិច្ចសម្របសម្រួលឱ្យទីម័រខាងកើតក្លាយជាសមាជិកអាស៊ាននាពេលខាងមុខ។

 

ក្រៅពីបញ្ហានេះ សម្តេច ហ៊ុន សែន និង លោក រ៉ាម៉ូស ហ័រតា ក៏បានពិភាក្សាពីការពង្រឹងនិងពង្រីកការធ្វើពាណិជ្ជកម្ម និងវិនិយោគរវាងប្រទេសទាំងពីរដែរ។ ប្រធានាធិបតីទីម័រខាងកើត រំពឹងថា ទំនាក់ទំនង និងការធ្វើពាណិជ្ជកម្មជាមួយកម្ពុជា នឹងកាន់តែល្អប្រសើរថែមទៀត ខណៈលោកនឹងទស្សនកិច្ចនៅកម្ពុជា នៅខែតុលាខាងមុខ។ លោក បានអះអាង ក្នុងទស្សនកិច្ចនេះ លោកនឹងខិតខំជំរុញការធ្វើពាណិជ្ជកម្ម កសិកម្ម និងវិស័យផ្សេងៗទៀតឱ្យកាន់តែល្អប្រសើរ។

 

ជាការឆ្លើយតប ប្រមុខរដ្ឋាភិបាលកម្ពុជា បានលើកឡើងថា  ការជឿជាក់លើគ្នាទៅវិញទៅមក បានជំរុញឱ្យទំនាក់ទំនងទ្វេភាគីកម្ពុជា-ទីម័រខាងកើត កាន់តែរីកចម្រើន។ ដ្បិតតែទំនាក់ទំនងសេដ្ឋកិច្ចនៃប្រទេសទាំងពីរ នៅមានកម្រិត តែកម្ពុជា និងទីម័រ នៅតែសង្ឃឹមថាអាចពង្រីកបន្ថែមបាន តាមរយៈការពិនិត្យលទ្ធភាពឱ្យមានការធ្វើពាណិជ្ជកម្មសេរីរវាងភាគីទាំង២។ ទន្ទឹមនឹងនេះ ថ្នាក់ដឹកនាំនៃប្រទេសទាំង២ ក៏បានជជែកគ្នាពីការបើកជើងហោះហើរត្រង់ កម្ពុជា-ទីម័រខាងកើតដែរ ដើម្បីផ្តល់ភាពងាយស្រួល និងកាន់តែប្រសើរ ដល់ការធ្វើទំនាក់ទំនង ពាណិជ្ជកម្ម និងវិនិយោគ៕