ប៉ុន្មានក្រោយយោធាអ៊ុយក្រែនឡោមព័ទ្ធទីក្រុង Lyman ហើយចូលគ្រប់គ្រងនៅពេលបន្ទាប់ ក្រសួងការពារជាតិរុស្ស៊ី ក៏ប្រកាសថា កងទ័ពរបស់ខ្លួន បានដកចេញពីទីក្រុងនេះហើយ ដើម្បីរកទីតាំងឈរជើងដែលអំណោយផលជាង។ លោក Serhii Cherevatyi អ្នកនាំពាក្យកងទ័ពអ៊ុយក្រែនៅប៉ែកខាងកើត អះអាងថា រុស្ស៊ីអាចមានកងទ័ពពី៥០០០នាក់ទៅ៥៥០០នាក់ក្នុងទីក្រុងដ៏សំខាន់ដែលជាផ្នែកមួយនៃតំបន់ដូណេត្ស។

 

តំបន់ដូណេត្ស និងតំបន់៣ទៀត ត្រូវបានរុស្ស៊ីបញ្ចូលជាទឹកដីរបស់ខ្លួននៅថ្ងៃទី៣០ ខែកញ្ញា។

 

ទីក្រុង Lyman ជាមជ្ឈមណ្ឌលភ័ស្តុភារ និងដឹកជញ្ជូនដ៏សំខាន់មួយរបស់កងទ័ពរុស្ស៊ីសម្រាប់ប្រតិបត្តិការនៅភាគខាងជើងតំបន់ដូណេត្ស។ ការដណ្ដើមបានទីក្រុងនេះ ជាជ័យជម្នះដ៏ធំមួយរបស់កងទ័ពអ៊ុយក្រែន ចាប់តាំងពីយុទ្ធនាការផ្លេកបន្ទោរវាយបកនៅតំបន់ Kharkiv ហើយដែលនឹងបើកផ្លូវដល់ការុលទៅទឹកដីលូហានបន្តទៀត។

 

ដូណេត្ស និងលូហាន ដែលបង្កើតបានជាតំបន់ដុនបាសនៅប៉ែកខាងកើតអ៊ុយក្រែន ជាគោលដៅសំខាន់របស់ប្រតិបត្តិការយោធារុស្ស៊ីចាប់តាំងពីការឈ្លានពានថ្ងៃទី២៤ ខែកុម្ភៈមក។ តំបន់ទាំង២ ក៏ជាសមរភូមិចាស់រវាងក្រុមផ្ដាច់ខ្លួនគាំទ្រដោយរុស្ស៊ី និងកម្លាំងអ៊ុយក្រែនដែរ៕