អន្តរជាតិ
នយោបាយអន្តរជាតិ
អាម៉េរិកនិងសម្ពន្ធមិត្ត រិះគន់រុស្ស៊ីថា ធ្វើឱ្យខាតបង់ពេលវេលាក្រុមប្រឹក្សាសន្តិសុខ ព្រោះលើកបញ្ហាដដែល 28, Oct 2022 , 9:29 pm
តំណាងអាម៉េរិកប្រចាំ UN លោកស្រី Linda Thomas-Greenfield (កណ្ដាល) និង ឯកអគ្គរដ្ឋទូតអង់គ្លេសប្រចាំ UN លោកស្រី Barbara Woodward (ឆ្វេង)។ រូបថត AFP
× អាមេរិក និងសម្ពន្ធមិត្ត នៅថ្ងៃទី២៧ ខែតុលា បានស្ដីបន្ទោសរុស្ស៊ីដែលបង្កការរំខាននាំឱ្យខ្ជះខ្ជាយពេលវេលារបស់ក្រុមប្រឹក្សាសន្តិសុខអង្គការសហប្រជាជាតិ (UN) ដោយនិយាយរឿងដដែលព័ត៌មានថាអាម៉េរិកមានកម្មវិធីអាវុធជីវសាស្ត្រនៅក្នុងអ៊ុយក្រែន។
កន្លងមករុស្ស៊ីនិយាយហើយនិយាយទៀតក្នុងកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិ (UN) អំពីបញ្ហាកម្មវិធីអាវុធជីវសាស្រ្តរបស់អាម៉េរិកនៅអ៊ុយក្រែន។ អាម៉េរិក និងអ៊ុយក្រែនច្រានចោលការចោទនេះម្ដងជាពីរដងដែរ។ ថ្លែងក្នុងកិច្ចប្រជុំក្រុមប្រឹក្សាសន្តិសុខ UN នៅថ្ងៃទី២៧ ខែតុលា អាម៉េរិក និងបណ្ដាប្រទេសសម្ពន្ធមិត្តបានបន្ទោសរុស្ស៊ីថា ការលើកឡើងដដែលៗជុំវិញរឿងអាវុធជីវសាស្ត្រនោះធ្វើឱ្យខ្ជះខ្ជាយពេលវេលា។
«កិច្ចប្រជុំនេះ ធ្វើឱ្យខ្ជះខ្ជាយពេលវេលាច្រើនណាស់។ វាជាការប៉ុនប៉ងបង្វែរចំណាប់អារម្មណ៍ពីអំពើឃោរឃៅដែលកងកម្លាំងរុស្ស៊ីកំពុងធ្វើនៅអ៊ុយក្រែន និងជាយុទ្ធសាស្ត្របង្ហាញអំពីភាពត្រឹមត្រូវនៃសង្គ្រាមមិនយុត្តិធម៌»។ ឯកអគ្គរដ្ឋទូតអាម៉េរិកប្រចាំ UN លោកស្រី Linda Thomas-Greenfield បាននិយាយបែបនេះ ហើយបន្ថែមថាការចោទប្រកាន់របស់រុស្ស៊ីជាការប្រតិដ្ឋសុទ្ធសាធហើយគ្មានភស្តុតាងឡើយ។
តំណាងអង់គ្លេសក៏នៅមិនស្ងៀមដែរ។ ឯកអគ្គរដ្ឋទូតអង់គ្លេសប្រចាំ UN លោកស្រី Barbara Woodward បានសួរទៅកាន់តំណាងរុស្ស៊ីក្នុងកិច្ចប្រជុំដដែលនោះថា តើក្រុមប្រឹក្សាសន្តិសុខត្រូវស៊ូទ្រាំស្ដាប់រឿងមិនសមហេតុផលនេះប៉ុន្មានដងទៀត?
ទោះអាម៉េរិកបដិសេធ រុស្ស៊ីមិនឈប់ឡើយ ហើយអះអាងថាខ្លួនកំពុងជំរុញឱ្យបើកការស៊ើបអង្កេតជាផ្លូវការ ដោយបានព្រាងសេចក្តីសម្រេចបង្កើតគណៈកម្មការមានសមាជិកក្រុមប្រឹក្សាសន្តិសុខទាំង១៥ ដើម្បីស៊ើបអង្កេតកម្មវិធីជីវសាស្ត្រ។ សកម្មភាពបែបនេះអាចធ្វើទៅបាន ប៉ុន្តែវាមិនដែលបានធ្វើឡើយ នៅក្រោមអនុសញ្ញាអាវុធជីវសាស្រ្តដែលបានចូលជាធរមានតាំងពីឆ្នាំ១៩៧៥។ នេះបើតាមទីភ្នាក់ងារព័ត៌មាន Reuters។
«តើអ្នកពិតជាគិតថាយើងល្ងង់មែនទេ? តើអ្នកគិតថាមន្ទីរបញ្ចកោណនឹងជូនដំណឹងទៅអ្នកតំណាងជាន់ខ្ពស់នៃការិយាល័យទទួលកិច្ចការរំសាយអាវុធរបស់ UN អំពីកម្មវិធីអាវុធជីវសាស្ត្រសម្ងាត់របស់ពួកគេនៅអ៊ុយក្រែនមែនទេ?»។ ឯកអគ្គរដ្ឋទូតរុស្ស៊ីប្រចាំ UN លោក Vassily Nebenzia បានឆ្លើយតបដោយចោទជាសំណួរបែបនេះវិញ ខណៈដែលលោកនិយាយពីការចង់បង្កើតគណៈកម្មការស៊ើបអង្កេតកម្មវិធីអាវុធជីវសាស្រ្ត។
វាមិនច្បាស់ពីពេលណាដែលរុស្ស៊ីនឹងដាក់ការព្រាងសេចក្តីសម្រេចឱ្យមានការបោះឆ្នោត។ ដើម្បីអនុម័តសេចក្ដីសម្រេចមួយ រុស្ស៊ីត្រូវការសំឡេងគាំទ្រចំនួនប្រាំបួន ហើយមិនមានការវ៉េតូពីចិន រុស្ស៊ី អាមេរិក បារាំង ឬអង់គ្លេសឡើយ។ បណ្ដាអ្នកការទូតរបស់ប្រទេសលោកខាងលិចជាច្រើន បាននិយាយថា វិធានការរបស់រុស្ស៊ីទំនងជានឹងបរាជ័យ៕
© រក្សាសិទ្ធិដោយ thmeythmey.com