ហ្វាំងឡង់ និងស៊ុយអែតត្រូវបានតួកគីចោទថាផ្តល់កន្លែងស្នាក់នៅដល់បក្សពលករឃើដដែលត្រូវបានចាត់ទុកជាក្រុមភេរវករ។ ប៉ុន្តែស៊ុយអែតរងការព្រមានខ្លាំងជាងគេ។ តួកគីម្តងហើយម្តងទៀតព្រមានថា ទាល់តែស៊ុយអែតបញ្ជូនជនសង្ស័យភេរវករទៅតួកគីតាមកិច្ចព្រមព្រៀងត្រីភាគីកន្លងមក ទើបសភាក្រុងអង់ការ៉ាផ្តល់សច្ចាប័ន។ 

 

ទាក់ទងរឿងនេះ នាយករដ្ឋមន្រ្តីហ្វាំងឡង់ Sanna Marin លើកឡើងថា បើទោះប្រធានាធិបតីតួកគីមានបញ្ហាជាមួយស៊ុយអែតជាជាងប្រទេសលោកស្រីក៏ដោយ ហ្វាំងឡង់នឹងមិនទុកស៊ុយអែតចោលឡើយ។ 

 

«វាពិតជាសំខាន់សម្រាប់យើង ជាការពិតណាស់ ហ្វាំងឡង់ និងស៊ុយអែតនឹងចូលណាតូរួមគ្នា»។ លោកស្រី Marin ថ្លែងបែបនេះទៅកាន់សន្និសីទសារព័ត៌មានរួមជាមួយនាយករដ្ឋមន្រ្តីស៊ុយអែត នៅក្រុងហែលស៊ិនគីថ្ងៃទី២៨ ខែតុលា។

 

ចំណែក នាយករដ្ឋមន្រ្តីស៊ុយអែតថ្មី Ulf Kristersson ដែលទើបចូលកាន់តំណែងសប្តាហ៍មុន បញ្ជាក់ថា ហ្វាំងឡង់ និងស៊ុយអែតបានបោះគ្រប់ជំហានរួមគ្នារហូតមកទល់ពេលនេះ ហើយគ្មានមហិច្ឆតាអ្វីក្រៅពីនេះទេ។

 

លោក Kristersson បញ្ជាក់ថា នឹងជួបជាមួយប្រធានាធិបតីតួកគី តៃយីប អ៊ែរដូហ្កាន់ឆាប់ៗនេះ។ លោក បន្ថែមទៀតថា វាពិតជាស្របតាមផ្លូវច្បាប់ណាស់ដែលតួកគីទទួលបានការបញ្ជាក់ថាស៊ុយអែតកំពុងប្តេជ្ញាធ្វើអ្វីតាមក្រមខណ្ឌនៃកិច្ចព្រមព្រៀង។ បើតាមការចេញផ្សាយរបស់កាសែតស៊ុយអែត Aftonbladet តួកគីអញ្ជើញនាយករដ្ឋមន្រ្តីស៊ុយអែតថ្មីឱ្យចូលរួមកិច្ចប្រជុំទ្វេភាគីនៅក្រុងអង់ការ៉ាប្រហែលជាថ្ងៃទី៨ ខែវិច្ឆិកា។

 

សូមបញ្ជាក់ថា ក្រោយរុស្ស៊ីឈ្លានពានអ៊ុយក្រែន ហ្វាំងឡង់ និងស៊ុយអែតកែប្រែគោលនយោបាយអព្យាក្រឹតរបស់ខ្លួនរាប់សិនឆ្នាំមកដាក់ពាក្យចូលសម្ព័ន្ធយោធាណាតូជាផ្លូវការកាលពីខែឧសភា។ ក្រោយត្រូវបានរដ្ឋណាតូទាំងអស់ចុះហត្ថលេខាលើពិធីសារចូលជាសមាជិករួច នីតិវីធីបន្ទាប់សម្រាប់សមាជិកភាពណាតូរបស់ប្រទេសទាំងពីរនៅជាប់គាំងដោយសារសភាតួកគី និងហុងគ្រីមិនទាន់ផ្តល់សច្ចាប័ននៅឡើយ៕