ប្រធានាធិបតីរុស្ស៊ី វ្ល៉ាឌីមៀ ពូទីន កាលពីខែមុនចេញបញ្ជាកែនទ័ពបម្រុង៣០ម៉ឺននាក់ដើម្បីបន្តប្រយុទ្ធនៅអ៊ុយក្រែន។ សេចក្តីប្រកាសរបស់លោកពូទីននេះនាំឱ្យមានការតវ៉ាកើនឡើងក្នុងប្រទេសប្រឆាំងនឹងសង្រ្គាមនៅអ៊ុយក្រែន ហើយមនុស្សរាប់ពាន់នាក់ភៀសចេញពីប្រទេសដើម្បីគេចពីកំណែននេះ។ ជាងមួយខែមក រុស្ស៊ីថាកិច្ចការនេះបញ្ចប់ហើយ។

 

«កិច្ចការឱ្យចល័តមនុស្ស៣០ម៉ឺននាក់ដោយលោកត្រូវបានចប់សព្វគ្រប់ហើយ»។ រដ្ឋមន្រ្តីការពារជាតិ Sergey Shoigu ប្រាប់លោក ពូទីន បែបនេះក្នុងកិច្ចប្រជុំនាវិមានក្រេមឡាំងដែលផ្សាយតាមទូរទស្សន៍។ បើតាមរដ្ឋមន្រ្តីការពារជាតិរូបនេះ គ្មានវិធានការចល័តទ័ពថែមទៀតទេ។ ជាងមួយខែប៉ុណ្ណោះ ការប្រមូលទ័ពបម្រុង៣០ម៉ឺននាក់នោះបានបញ្ចប់។ ទាហាន ៨២០០០ នាក់ត្រូវបានបញ្ជូនទៅតំបន់ប្រយុទ្ធ ខណៈនៅសល់ប៉ុន្មានទៀតកំពុងហ្វឹកហ្វឺន។ 

 

យ៉ាងណាមិញ ប្រធានាធិបតីអ៊ុយក្រែន វ៉ូឡូឌីមៀ ហ្សេលេនស្គី និយាយថាការប្រកាសរបស់រុស្ស៊ីនេះមិនប្រាកដនឹងបញ្ចប់មែនទេ ដោយសារតែកងកម្លាំងក្រុងមូស្គូអន់ណាស់ និងនៅត្រូវការជំនួយកម្លាំងជាច្រើនទៀត។

 

«យើងមានរបាយការណ៍ថា សត្រូវបញ្ចប់ការចល័តទ័ពហើយដែលហាក់ដូចជាមិនត្រូវការបញ្ជូនពលរដ្ឋរុស្ស៊ីទៅសមរភូមិជួរមុខជាថ្មីនោះទេ»។ លោក ហ្សេលេនស្គី លើកឡើងបែបនេះក្នុងវីដេអូថ្លែងការណ៍ដោយសង្កត់ធ្ងន់ថា ចំពោះយោធាក្រុងកៀវដែលនៅសមរភូមិជួរមុខដែរនោះមិនគិតដូច្នោះទេ។ 

 

បើតាមមេដឹកនាំអ៊ុយក្រែន បើទោះរុស្ស៊ីកំពុងបង្កើនសម្ពាធលើអ៊ុយក្រែនដោយកែនទ័ពបម្រុងក៏ដោយ ទាហានរុស្ស៊ីទាំងនោះមិនបានត្រៀមខ្លួន ហើយឆ្លងកាត់ការហ្វឹកហ្វឺនគ្រប់គ្រាន់នោះទេ។ ម្យ៉ាងត្រូវបានមេបញ្ជាការបញ្ជាយ៉ាងឃោរឃៅ ទើបក្រុងកៀវសន្មតថាអាចនឹងមានពលរដ្ឋរុស្ស៊ីបន្ថែមទៀតត្រូវបញ្ជូនទៅសមរភូមិ៕