ស្ពានសម្រាប់ថ្មើរជើងដែលបាក់ ត្រូវសាងសង់តាំងពីសម័យអាណានិគមអង់គ្លេសមក។ បើតាមអាជ្ញាធរឥណ្ឌា មនុស្សប្រមាណ៥០០នាក់ កំពុងអបអរពិធីបុណ្យសាសនាមួយលើ និងនៅក្បែរស្ពានយោលក្នុងរដ្ឋ Gujarat ភាគខាងលិចឥណ្ឌា។

 

ទំនងមិនអាចទ្រទម្ងន់បាន ស្ពានចំណាស់១៥០ឆ្នាំ ក៏បាក់ដាច់ ហើយមនុស្សជាច្រើនក៏ធ្លាក់ចុះទឹកទន្លេ ខណៈមនុស្សជាច្រើនប្រឹងតោងបំណែកស្ពាននេះ។ ស្ពានដែលឆ្លងកាត់ទន្លេ Machchhu ទើបបើកដំណើរការឡើងវិញក្រោយជួសជុលរួចរាល់ប៉ុណ្ណោះ។

 

មេប៉ូលិសក្រុង Morbi ប្រាប់ទីភ្នាក់ងារព័ត៌មាន AFP ថា សាកសពយ៉ាងតិច១២០ ត្រូវបានរកឃើញ។ មនុស្សប្រមាណ១៣០នាក់ទៀត ត្រូវបានសង្រ្គោះ។ 

 

ស្ពាននេះ មានប្រវែង២៣៣ម៉ែត្រ និងទទឹង១,៥ម៉ែត្រ ហើយត្រូវដាក់ឱ្យតាំងពីឆ្នាំ១៨៨០មក៕