អន្តរជាតិ
នយោបាយអន្តរជាតិ
លោក បៃដិន ថាពេញចិត្តនឹងលទ្ធផលបោះឆ្នោតសភា ខណៈបក្សប្រជាធិបតេយ្យទំនងបន្តគ្រប់គ្រងព្រឹទ្ធសភា
13, Nov 2022 , 6:29 pm
×![]()
ថ្លែងទៅកាន់អ្នកកាសែតពីទីក្រុងភ្នំពេញនៅថ្ងៃទី១២ ខែវិច្ឆិកា ប្រធានាធិបតីអាម៉េរិក ចូ បៃដិន ថាសប្បាយចិត្តនឹងលទ្ធផលជាបឋមនៃការបោះឆ្នោតជ្រើសរើសសមាជិកសភាអាម៉េរិកទី១១៨ បន្ទាប់ពីបក្សប្រជាធិបតេយ្យតំណាងឱ្យរដ្ឋ Nevada ត្រូវបានព្យាករប្រជែងឈ្នះបេក្ខភាពបក្សសាធារណរដ្ឋ លោក Adam Laxalt ។
បន្ទាប់ពីសមាជិកព្រឹទ្ធសភាដែលមកពីបក្សប្រជាធិបតេយ្យ លោកស្រី Catherine Cortez ត្រូវបានព្យាករថាដណ្តើមបានកៅអីនៅព្រឹទ្ធសភាម្តងទៀតតំណាងឱ្យរដ្ឋ Nevada ប្រធានាធិបតីអាម៉េរិក ចូ បៃដិនលើកឡើងនៅថ្ងៃទី១៣ ខែវិច្ឆិកាថា លោកពិតជារីករាយចំពោះលទ្ធផលបោះឆ្នោតសភាពេលនេះ ហើយនេះជាការឆ្លុះបញ្ចាំងពីសមត្ថភាពបេក្ខភាពបក្សលោកដែលចូលប្រជែង។
បើទោះរដ្ឋ Georgia អាចនឹងមានការបោះឆ្នោតជុំទីពីរនៅខែក្រោយក៏ដោយ ចាញ់ ឬឈ្នះបក្សប្រជាធិបតេយ្យនៅតែអាចបន្តគ្រប់គ្រងព្រឹទ្ធសភាដដែលជាមួយកៅអីដែលនឹងដណ្តើមបាននៅរដ្ឋ Nevanda នេះ។
បើចាញ់នៅរដ្ឋ Georgia បក្សប្រជាធិបតេយ្យកាន់កាប់អាសនៈ៥០នៅព្រឹទ្ធសភាស្នើនឹងបក្សសាធារណរដ្ឋដែរ តែប្រធានព្រឹទ្ធសភាលោកស្រី កាម៉ាឡា ហារីស ដែលតំណាងបក្សប្រជាធិបតេយ្យ អាចបោះឆ្នោតសម្រេចសំឡេងភាគច្រើនឱ្យបក្សប្រជាធិបតេយ្យនៅព្រឹទ្ធសភាបាន។ ប៉ុន្តែ បើឈ្នះ បក្សប្រជាធិបតេយ្យអាចគ្រប់គ្រងព្រឹទ្ធសភាតែម្តងជាមួយសំឡេងភាគច្រើន ៥១ ទល់នឹង ៤៩។
« ឥឡូវ យើងកំពុងផ្តោតលើរដ្ឋ Georgia។ យើងមានអារម្មណ៍ល្អចំពោះកន្លែងយើងឈរឥឡូវ។ ហើយខ្ញុំដឹងខ្ញុំជាមនុស្សសុទិដ្ឋិនិយម»។ លោក បៃដិន ប្រាប់អ្នកកាសែតនៅទីក្រុងភ្នំពេញបែបនេះមុនកិច្ចប្រជុំកំពូលអាស៊ីបូព៌ា។
ចំណែក បក្សណាគ្រប់គ្រងរដ្ឋសភានៅមិនទាន់ចេញលទ្ធផលសម្រេចនៅឡើយ។ ត្រឹមថ្ងៃទី១២ ខែវិច្ឆិកា បក្សប្រជាធិបតេយ្យដណ្តើមបានកៅអី ២០៤ ហើយបក្សសាធារណរដ្ឋប្រជែងបាន ២១១ អាសនៈ ខណៈបក្សនីមួយៗត្រូវការអាសនៈចំនួន២១៨ដើម្បីអាចកាន់កាប់រដ្ឋសភា។
កន្លងមក លោក បៃដិន ចាត់ទុកការបោះឆ្នោតពាក់កណ្តាលអាណត្តិប្រធានាធិបតីនេះជាការធ្វើតេស្តលើលទ្ធិប្រជាធិបតេយ្យ នៅពេលបេក្ខភាពរាប់រយនាក់មកពីបក្សសាធារណរដ្ឋឱបក្រសោបការអះអាងមិនពិតរបស់អតីតប្រធានាធិបតីអាម៉េរិក ដូណាល់ ត្រាំ ដែលថាមានការលួចសន្លឹកឆ្នោតកាលពីបោះឆ្នោតប្រធានាធិបតីឆ្នាំ២០២០៕
Tag:
អាម៉េរិក
© រក្សាសិទ្ធិដោយ thmeythmey.com
