អាជ្ញាធរ សហគមន៍ និងអ្នកសារព័ត៌មានជាង១០០នាក់ ចែករំលែកបទពិសោធដោះស្រាយទំនាស់ដោយសន្តិវិធី

ជាតិ

អាជ្ញាធរ សហគមន៍ និងអ្នកសារព័ត៌មានជាង១០០នាក់ ចែករំលែកបទពិសោធដោះស្រាយទំនាស់ដោយសន្តិវិធី

11, Dec 2022 , 8:29 am

រូបភាព

រូបពី ACT

ដោយ: ប៉ូ សាគុន

កំពត៖ អាជ្ញាធរ និងសហគមន៍ចំនួន៧ រួមទាំងអ្នកសារព័ត៌មានជាង១០០នាក់ មកពី៧ខេត្តក្រុងនិងរាជធានី ត្រូវបានអង្គការក្រុមការងារដោះស្រាយទំនាស់ ហៅកាត់ថា ACT អញ្ជើញឱ្យចូលរួម កិច្ចប្រជុំប្រចាំឆ្នាំ ដើម្បីចែករំលែកបទពិសោធ ដោះស្រាយទំនាស់ដោយសន្តិវិធី នៅក្រុងបូកគោ ខេត្តកំពត កាលពីពេលកន្លងទៅ។

ចុចទីនេះដើម្បីទទួលបានព័ត៌មានរហ័ស

កិច្ចប្រជុំប្រចាំឆ្នាំ ដែលធ្វើឡើងដើម្បីចែករំលែកបទពិសោធ ដោះស្រាយទំនាស់ដោយសន្តិវិធីនេះ ត្រូវបានធ្វើឡើងដោយបញ្ចូលគម្រោង២ចូលគ្នា។ គឺគម្រោងការកសាងសន្តិភាពសហគមន៍ និងគម្រោងប្រព័ន្ធផ្សព្វផ្សាយសន្តិភាព (សារព័ត៌មានសន្តិភាព)។ អាជ្ញាធរ សហគមន៍ និងអ្នកសារព័ត៌មានជាង១០០នាក់នោះ មកពីរាជធានីភ្នំពេញ ខេត្តមណ្ឌលគិរី កំពង់ឆ្នាំង កំពត កែប និងខេត្តក្រចេះ។

ប្ដូរពីការពាក់មុខយក្សដាក់គ្នា ការចោទប្រកាន់គ្នាទៅវិញទៅមក ការមិនទុកចិត្តគ្នា ការស្អប់គ្នា អាជ្ញាធរ ប្រជាសហគមន៍ និងអ្នកសារព័ត៌មាន បានចាប់ផ្ដើមស្គាល់គ្នា ធ្វើការជាមួយគ្នា លើកបញ្ហាទៅដាក់លើតុជជែករកដំណោះស្រាយ រហូតដល់ជួយគាំទ្រគ្នាទៅវិញទៅមក ក្នុងការដោះស្រាយបញ្ហាដែលកើតឡើងក្នុងសហគមន៍។

កញ្ញា ស្រី សុធាវី នាយិការអង្គការក្រុមការងារដោះស្រាយទំនាស់ ហៅកាត់ថា ACT បានប្រាប់សារព័ត៌មានថ្មីៗថា កម្មវិធីជួបជុំបណ្ដាញប្រចាំឆ្នាំនេះ ធ្វើឡើងក្នុងគោលបំណងចែករំលែកបទពិសោធគ្នាទៅវិញទៅមក អំពីការដោះស្រាយទំនាស់ ដែលសហគមន៍ អាជ្ញាធរ និងអ្នកសារព័ត៌មាន ធ្លាប់បានធ្វើកន្លងមក ក្រោយពីបានរៀនវគ្គបណ្ដុះ ការកសាងសន្តិភាពសហគមន៍ និងការដោះស្រាយទំនាស់ក្រៅប្រព័ន្ធតុលាការ។ ក្រៅពីនោះកម្មវិធីជួបជុំនេះ ក៏ជាការផ្ដល់ឱកាសដល់ភាគីពាក់ព័ន្ធខាងលើ ឱ្យបន្តកិច្ចសហប្រតិបត្តិការរវាងគ្នានឹងគ្នាបន្តទៅមុខ
ទៀតផងដែរ។

កញ្ញា ស្រី សុធាវី នាយិការអង្គការក្រុមការងារដោះស្រាយទំនាស់

កញ្ញាបន្ថែមថា ជារៀងរាល់ឆ្នាំវគ្គបណ្ដុះបណ្ដាល ត្រូវបានធ្វើឡើងដើម្បីពង្រឹងសមត្ថភាព និងគាំទ្រសកម្មភាពរបស់សហគមន៍ ឬបណ្ដាញអ្នកសារព័ត៌មាន ក្នុងការផ្សព្វផ្សាយបន្តទៅសហគមន៍របស់ពួកគេ ក្នុងកិច្ចពិភាក្សា ការតស៊ូមតិផ្សេងៗ។ ការលើកកម្ពស់សិទ្ធិសេរីភាពរបស់ប្រជាពលរដ្ឋ និងសហគមន៍ ការដោះស្រាយបញ្ហានានា និងការស្វែងរកការឆ្លើយតបពីអាជ្ញាធរ សម្រាប់ដំណោះស្រាយក្នុងសហគមន៍ ក៏ជាគោលបំណងសំខាន់ក្នុងវគ្គបណ្ដុះបណ្ដាលដែរ។ បន្ថែមពីនោះ បន្ទាប់ពីបណ្ដុះបណ្ដាលរួច អង្គការ ACT បានផ្ដល់ឱកាសច្រើន ដល់សិក្ខាកាមក្នុងការធ្វើសកម្មភាពនៅតាមមូលដ្ឋាន។

កញ្ញានាយិការអង្គការក្រុមការងារដោះស្រាយទំនាស់ បញ្ជាក់ថែមទៀតថា ACT ទទួលបានជោគជ័យក្នុងការធ្វើឱ្យ អ្នកសារព័ត៌មាន ប្រជាពលរដ្ឋនៅតាមសហគមន៍ និងអាជ្ញាធរមូលដ្ឋាន មានទំនាក់ទំនងល្អរវាងគ្នានិងគ្នា រួមគ្នាដោះស្រាវបញ្ហាក្នុងសហគមន៍ ក៏ដូចជាជួយគាំទ្រគ្នាទៅវិញទៅមក ក្នុងការធ្វើការងារណាមួយ ដើម្បីប្រយោជន៍រួម។

កញ្ញា ស្រី សុធាវី បន្ថែម៖«យើងចង់ដឹងថា ក្រោយពីពួកគាត់រៀនជាមួយពួកយើងហើយ គាត់យកទៅអនុវត្តបានកម្រិតណា។ មានចែករំលែកចំណេះនោះបន្តទេ? តើចំណេះទាំងនោះបានផ្ដល់ប្រយោជន៍អ្វីខ្លះដល់គាត់ និងសហគមន៍គាត់? ជាលទ្ធផលគាត់យកទៅអនុវត្តិ និងបានផលល្អច្រើន»។

ក្រោយពីទទួលបានការបណ្ដុះបណ្ដាល អង្គការ ACT សង្កេតឃើញថា សិក្ខាកាមមានការផ្លាស់ប្ដូរទាំងជាលក្ខណៈផ្ទាល់ខ្លួន និងជាសហគមន៍ ដោយពួកគេកាន់តែយល់ពីអ្វីជាសន្តិភាព អ្វីជាការដោះស្រាយទំនាស់ និងការអន្តរាគមន៍ផ្សេងៗនៅតាមសហគមន៍។ ចំណែកអ្នកសារព័ត៌មានវិញ បានយល់ដឹងច្រើនពីវិជ្ជាជីវៈអ្នកសារព័ត៌មាន និងអនុវត្តកាមក្រមសីលធម៌របស់ខ្លួន។

រូបថតអនុស្សាវរីយ៍

វគ្គបណ្ដុះបណ្ដាលការកសាងសន្តិភាពសហគមន៍ និងការដោះស្រាយទំនាស់ក្រៅប្រព័ន្ធតុលាការ ដែលធ្វើឡើងក្រោមគម្រោងការកសាងសន្តិភាពសហគមន៍ មានរយៈពេល៣ឆ្នាំចាប់ពីឆ្នាំ២០២២-២០២៤។

សូមបញ្ជាក់ថា កន្លងមកអង្គការ ACT ធ្លាប់បានអនុវត្តគម្រោង ការកសាងសន្តិភាពអន្តរជាតិពន្ធុ (ផ្ដោតសំខាន់លើការបញ្ចៀសអំពើហិង្សា) គម្រោងការពង្រឹងសិទ្ធិស្ត្រី(ការលុបបំបាត់អំពើហិង្សាលើស្ត្រី)។ គម្រោងនេះបានជួយពង្រឹងសមត្ថភាព និងភាពអង់អាចរបស់ស្ត្រីច្រើន ពិសេសស្ត្រីជនជាតិដើមភាគតិច និងជនជាតិផ្សេងទៀត ដែលមានប្រពៃណីមិនសូវឱ្យតម្លៃដល់ស្ត្រី។ គម្រោងអភិបាលកិច្ចល្អ (ការផ្ដល់សេវា ឱ្យប្រជាពលរដ្ឋមានភាពប្រសើរជាងមុន) បានជួយច្រើនសម្រាប់អ្នកផ្ដល់សេវា ឬអាជ្ញាធរភូមិឃុំ មណ្ឌលសុខភាព ក៏ដូចជាសេវាអប់រំ នៅកម្រិតបឋមសិក្សា៕

Tag:

កំពត

សហគមន៍

អ្នកសារព័ត៌មាន