កូនប្រើសផឿក​ឈ្មោលមួយក្បាល បានកើតនៅថ្ងៃទី២៤ ខែតុលា ឆ្នាំ២០២២។ លោក ទ្រី ស៊ីថេង ប្រធានថែរក្សា និងសង្គ្រោះសត្វព្រៃភ្នំតាម៉ៅ បានប្រាប់សារព័ត៌មានThmeyThmey25ថា កូនប្រើសនោះកើតមកមានស្ថានភាពសុខភាពដូចទៅនឹង​កូនប្រើសធម្មតា ប៉ុន្ដែភ្នែករបស់វាហាក់មើលមិនសូវច្បាស់នោះឡើយ។
 

ប្រធានថែរក្សា និងសង្គ្រោះសត្វព្រៃភ្នំតាម៉ៅរូបនេះបញ្ជាក់ដូច្នេះ៖ «សុខភាពរបស់វាធម្មតាទាំងអស់។ គ្រាន់តែ ប្រើសផឿកនោះ ដូចជាចាញ់ពន្លឺថ្ងៃជាងប្រើសធម្មតា បើតាមការសង្កេតពេលថ្ងៃភ្នែករបស់វាបើកមិនសូវធំទេ។ គិតទៅបើគិតពីថ្ងៃកើតមកដល់ពេលនេះជិត២ខែហើយ កូនប្រើសនោះនៅតែមិនទាន់សាំហ្នឹងពន្លឺថ្ងៃដដែល»។
 

កន្លងមកប្រើសផឿកនេះធ្លាប់មាន នៅក្នុងមជ្ឈមណ្ឌលសូនសត្វភ្នំតាម៉ៅ ប៉ុន្ដែជាងពីរឆ្នាំមុន ត្រូវបានងាប់ ដោយសារដល់វ័យជរា។ បន្ថែមលើនេះ លោក ទ្រី ស៊ីថេង បន្តថា សត្វផឿកប្រភេទនេះ អាចកម្រ ដោយសារទាំងអ្នកអភិរក្ស និងការពារសត្វព្រៃមិនងាយបានឃើញ វត្តមានរបស់វាឡើយ៕