បើតាមលោក រស់ សុវាចា ការកំណែវិញ្ញាសា ចាប់ពីថ្ងៃទី១២ ដល់ ១៤ ធ្នូ គ្មានចំណុចអវិជ្ជមានអ្វីឡើយ ពោលគឺដំណើរការទៅយ៉ាងល្អ។ ថ្លែងប្រាប់សារព័ត៌មានថ្មីៗ តាមតេឡេក្រាម អ្នកនាំពាក្យរូបនេះ បានបញ្ជាក់ថា៖«ក្រោយពីកែកិច្ចការបេក្ខជនចប់ ប្រធានមណ្ឌលកំណែដឹកសន្លឹក​ MCS  ឯកសារផ្សេងៗមកទុកនៅកន្លែងមានសុវត្ថិភាព ហើយតាមការគ្រោងទុកនៅថ្ងៃទី១៥ ធ្នូ ២០២២ នឹងមានការប្រជុំគណៈកម្មការស្រង់ បូកពិន្ទុ ដោយកុំព្យូទ័រ និងគណៈកម្មការផ្ទៀងផ្ទាត់»។
 

ដោយឡែកនៅថ្ងៃទី១៦ ដល់២៥ ធ្នូ ក្រសួងអប់រំ នឹងដំណើរការបូកពិន្ទុស្រង់ដោយកំព្យូទ័រ ពិនិត្យផ្ទៀងផ្ទាត់ពិន្ទុ។ នេះជាការបញ្ជាក់របស់លោក សុវាចា ដែលបានបន្ថែមថា៖« នៅថ្ងៃទី២៦ ធ្នូ ក្រសួងអប់រំ យុជន និងកីឡា នឹងប្រជុំសម្រេចលើលទ្ធផលប្រឡងបាក់ឌុប ដើម្បីត្រៀមប្រកាសជូនបេក្ខជនតាមការគ្រោងទុក »។
 

ការប្រកាសលទ្ធផលសម្រាប់បេក្ខជននៅរាជធានីភ្នំពេញ និងខេត្តកណ្តាល ធ្វើឡើងនៅថ្ងៃទី២៧ធ្នូ ។ ដោយឡែកលទ្ធផលបេក្ខជនតាមខេត្តផ្សេងៗ នឹងប្រកាសនៅថ្ងៃទី២៨ ខែធ្នូ ។

សម្រាប់ការប្រឡងបាក់ឌុបឆ្នាំនេះ បេក្ខជនសរុបមានចំនួន១២៨ ១៣៥នាក់ (ស្រី៦៨ ៧៧១នាក់) មាន២២១មណ្ឌល ដែលត្រូវជា៥ ១៧៤បន្ទប់៕