នាជំនួបជើងទី២ នៅ​កីឡដ្ឋាន Thammasat ​ថ្ងៃ​ទី១០ ខែមករា ក្រុមម្ចាស់ផ្ទះថៃ នៅតែបង្ហាញរបៀបលេងដ៏ល្អ ដោយការវាយសម្រុកទៅកាន់ក្រុមភ្ញៀវម៉ាឡេស៊ីតាំងពីដើមវគ្គទី១ រហូតសម្រេចគ្រាប់បាល់នាំមុខដោយខ្សែប្រយុទ្ធ Teerasil Dangda នៅនាទី១៩។ 
 

ចូលដល់វគ្គទី២ ក្រោយការប្រកួតដំណើរការបាន១០នាទី Bordin Phala បន្ថែមគ្រាប់ទី២ឱ្យក្រុមរហស្សនាមដំរីចម្បាំង មុន Adisak Kraisorn ដែលប្តូរជំនួស Dangda សម្រេចគ្រាប់ទី៣នៅនាទី៧១។ បញ្ចប់ការប្រកួតថៃឈ្នះ ម៉ាឡេស៊ី ៣-០។ ដោយជើងទី១ ម៉ាឡេស៊ីឈ្នះថៃ ១-០ ដូច្នេះសរុបទាំងពីរជើងថៃឈ្នះ ៣-១។
 

តាមរយៈលទ្ធផល ថៃទទួលបានកៅអីឡើងទៅកាន់វគ្គផ្តាច់ព្រ័ត្រ AFF Cup ដោយត្រូវជួបវៀតណាមដើម្បីការពារតំណែងជើងឯករបស់ខ្លួន។
 

នៅមុនការប្រកួតជើងទី២នេះ Madame Pang ដែលជាអ្នកចាត់ការទូទៅក្រុមថៃ សន្យាផ្តល់ប្រាក់រង្វាន់លើកទឹកចិត្តបន្ថែមដល់គ្រូបង្វឹកលោក Mano Polking និងកីឡាករ ប្រសិនថៃឈានដល់វគ្គផ្តាច់ព្រ័ត្រ AFF Cup ឆ្នាំ២០២២។
 

បើតាមការចុះផ្សាយរបស់កាសែតវៀតណាម Postsen ស្ត្រីមហាសេដ្ឋីថៃ វ័យ៥៦ឆ្នាំរូបនេះ អះអាងថាជំនួបជើងទី២ទល់ម៉ាឡេស៊ី ជាការប្រកួតសំខាន់ដ្បិតជើងទី១ ថៃបានចាញ់ ១-០ ដូច្នេះ ដើម្បីជាការលើកទឹកចិត្តគ្រូ និងកីឡាករ អ្នកស្រី Pang នឹងផ្តល់ប្រាក់រង្វាន់ចំនួន១៥ម៉ឺនដុល្លារបន្ថែមទៀត។
 

ថៃ នឹងត្រូវការពារតំណែងជើងឯក AFF Cup ឆ្នាំ២០២២ ទល់វៀតណាមនៅថ្ងៃទី១៣ ខែមករា សម្រាប់ជើងទី១នៅដីវៀតណាម និងជើងទី២នៅថៃ ថ្ងៃទី១៦ ខែមករា៕