កាលពីថ្ងៃទី១៦ ខែមករា អ្នកស្រី អ៊ុក ឆាយ៉ាវី បានសរសេរលិខិតទៅសម្តេច ស ខេង ដើម្បីជូនដំណឹងអំពីការធ្វើធម្មយាត្រាដោយថ្មើរជើង ពីរាជធានីភ្នំពេញ ទៅកាន់បូជនីយដ្ឋានប្រវត្តិសាស្រ្តឧកញ៉ា ឃ្លាំង មឿង ក្នុងខេត្តពោធិ៍សាត់ ដោយត្រូវឆ្លងកាត់៣ខេត្ត គឺកណ្តាល កំពង់ស្ពឺ និង កំពង់ឆ្នាំង។ អ្នកស្រី ជម្រាបគោលបំណងទៅសម្តេចថា ការធ្វើធម្មយាត្រានេះ ដើម្បីលើកកម្ពស់សីលធម៌សង្គម និងដើម្បីជំរុញឲ្យមនុស្សគ្រប់រូបមិនថាអ្នកតូចឬអ្នកធំ ត្រូវមានសីលធម៌។ 
 

សម្តេចរដ្ឋមន្រ្តីមហាផ្ទៃ ប្រាប់អ្នកស្រីប្រធានសមាគមគ្រូបង្រៀនឯករាជ្យកម្ពុជា ឲ្យសហការជាមួយរដ្ឋបាលរាជធានីភ្នំពេញ និងរដ្ឋបាលខេត្តពាក់ព័ន្ធ ដើម្បីធានាបានសុវត្ថិភាពចរាចរណ៍តាមដងផ្លូវ និងសណ្តាប់សាធារណៈ។ សម្តេច ថែមទាំងជំរុញឲ្យអ្នកចូលរួមក្នុងធម្មយាត្រានេះ អនុវត្តវិធានការនៃការទប់ស្កាត់ជំងឺកូវីដ-១៩ផងដែរ។ 
 

លិខិតរបស់អ្នកស្រី អ៊ុក ឆាយ៉ាវី បានឲ្យដឹងថា អ្នកចូលរួម មានចំនួនយ៉ាងតិច៥០នាក់ ដោយត្រូវជួបជុំគ្នានៅកន្លែងរូបសំណាកលោកយាយពេញ នៅព្រឹកថ្ងៃទី១ ខែកុម្ភៈ ឆ្នាំ២០២៣ ហើយនឹងចាប់ផ្តើមដើរធម្មយាត្រាទៅទីតាំងឧកញ៉ា ឃ្លាំង មឿង៕