ក្រៅពីនេះសមត្ថកិច្ចប៉ុស្ដិ៍ ក៏ត្រូវយាមល្បាត និងចុះអន្តរាគមន៍លើសកម្មភាពល្មើសនានានៅក្នុងសង្កាត់ដែរ ដើម្បីធានាសុវត្ថិភាព និងសណ្តាប់ធ្នាប់ក្នុងមូលដ្ឋាន។ មានការងារច្រើន ប៉ុន្តែកម្លាំងប៉ុស្តិ៍មានតែ ៣នាក់ប៉ុណ្ណោះ។
 

បើតាម លោក អឿន ពៀត បើទោះបីកម្លាំងសមត្ថកិច្ចមិនគ្រប់គ្រាន់ ប៉ុន្តែពួកគេបានព្យា​យាម​ផ្ដល់សេវាឱ្យប្រជាពលរដ្ឋក្នុងមូលដ្ឋាន តាមលទ្ធភាពដែលអាចធ្វើទៅបាន។ មេប៉ុស្ដិ៍រូបនេះ បានបញ្ជាក់យ៉ាងដូច្នេះ៖ «ខ្ញុំនៅតែខំប្រឹងបម្រើពលរដ្ឋតាមលទ្ធដែលអាចធ្វើទៅបាននៅក្នុងមូលដ្ឋាន។ មិនថាពេលថ្ងៃ ឬពេលយប់នោះទេ ឱ្យតែពលរដ្ឋគាត់មករកពួកខ្ញុំ ព្រោះពួកខ្ញុំនៅប្រចាំការ ២៤ លើ២៤ម៉ោង»។

 

យ៉ាងណាមិញ លោក អឿន ពៀត ក៏បានលើកពីផលលំបាកខ្លះដែលប៉ុស្ដិ៍របស់លោក បាន និងកំពុងជួបប្រទះ ដោយសារតែការខ្វះខាតកម្លាំងនេះដែរ។ ការលំបាកទាំងនោះមានដូចជា ពិបាកក្នុងបែងចែកការងារ និងការយាមល្បាតតាមភូមិនៅពេលយប់ និងការផ្តល់សេវារដ្ឋបាលជូនពលរដ្ឋក្នុងមូលដ្ឋានមិនមានប្រសិទ្ធភាព​ ជាដើម។ ក្នុងន័យនេះ លោកមេប៉ុស្តិ៍ ក៏ស្នើសុំការយោគយល់ពីពលរដ្ឋ ក្នុងពេលដែលមន្ត្រីប៉ុស្តិ៍ផ្តល់សេវាយឺតយ៉ាវ ហើយក៏សុំឱ្យពលរដ្ឋ និងប្រជាការពារភូមិបន្តសហការជាមួយកម្លាំងប៉ុស្តិ៍ ដើម្បីធានាសុខ សុវត្ថិភាពនៅក្នុងសង្កាត់ផងដែរ។
 

ជុំវិញបញ្ហាខ្វះកម្លាំង លោក អឿន ពៀត បានគូសបញ្ជាក់ថា លោកបានស្នើទៅថ្នាក់លើច្រើនលើករួចហើយ។ លោកមេប៉ុស្តិ៍ សង្ឃឹមថា ​ប៉ុស្តិ៍របស់ខ្លួណ នឹងទទួលបានមន្ត្រីបន្ថែមនៅក្នុងឆ្នាំ២០២៣នេះ ដើម្បីបង្កើនប្រសិទ្ធភាពនៃការផ្តល់សេវា និងការពារសុវត្ថិភាពជូនពលរដ្ឋ៕

​

អានអត្ថបទពាក់ព័ន្ធផ្សេងទៀត៖ យុវជនសកម្ម សេវាល្អ