ប៉ុស្តិ៍នគរបាលឃុំកណ្តោល ​មានកម្លាំងសរុប ៦នាក់ ដែលកំពុងផ្តល់សេវារដ្ឋបាល និងការ​ពារ​សុវត្ថិភាពជូនពលរដ្ឋ។ លោក សុខ រចនា មេប៉ុស្តិ៍ស្ដីទីនៃប៉ុស្តិ៍នគរបាលឃុំកណ្តោល បានបញ្ជាក់ថា ដ្បិតប៉ុស្តិ៍មានកម្លាំងត្រឹមនាក់មែន តែលោកបានរៀបចំ និងបែងចែកឱ្យមានការល្បាតទាំងពេលយប់ និងពេលថ្ងៃ ដោយសហការយ៉ាងជិតស្និទ្ធជាមួយអាជ្ញាធរភូមិ និងប្រជាការពារភូមិ។ សព្វថ្ងៃនៅឃុំកណ្តោល មានកម្លាំងប្រជាការពារភូមិប្រមាណ៣០នាក់​។ នេះបើតាមលោក សុខ រចនា ដោយលោកបានបន្ថែមដូច្នេះ៖ «សម្រាប់កម្លាំងប៉ុស្តិ៍របស់យើង គឺយើងបែងចែកជា២ក្រុម គឺក្រុមល្បាតពេលថ្ងៃ និងពេលយប់។ ចំណែកប្រជាការពារ យើងឱ្យគាត់ចូលរួមជាមួយយើងម្តងម្កាល ក៏ប៉ុន្តែយើងឱ្យគាត់ល្បាតនៅក្នុងតំបន់របស់គាត់»។

 

មេប៉ុស្តិ៍ស្ដីទីនៃប៉ុស្តិ៍នគរបាលឃុំកណ្តោល បានបញ្ជាក់ឱ្យដឹងទៀតថា គោលបំណងនៃការល្បាតនេះ គឺដើម្បីសង្កេតពីស្ថានភាពទូទៅ នៅក្នុងឃុំ ជាពិសេសតាមដានសកម្មភាពនៃការលួចលាក់លេងល្បែងស៊ីសង បញ្ហាក្មេងទំនើង និងបញ្ហាគ្រឿងញៀន ក្នុងន័យទប់ស្កាត់ជាមុន កុំឱ្យមានភាពអសកម្មណាមួយកើតឡើងធ្ងន់ធ្ងរ។

 

សម្រាប់លោក មេប៉ុស្តិ៍ស្ដីទី ដើម្បីធានាបាននូវសន្តិសុខ សុវត្ថិភាពបន្ថែមទៀត នៅក្នុងឃុំ ការចូលរួម​សហការពីប្រជាពលរដ្ឋទាំងអស់ គឺមិនអាចខ្វះបាននោះឡើយ។ បើទោះបីជាកន្លងមក លោក សុខ រចនា អះអាងថា ប៉ុស្តិ៍ទទួលបាន​ការរាយការណ៍ករណីមិនប្រក្រតីជាច្រើនពីប្រជាពលរដ្ឋក៏ដោយ មេប៉ុស្តិ៍ស្តីទីរូបនេះ នៅតែអំពាវនាវឱ្យពលរដ្ឋបន្តសហការជាមួយកម្លាំងអាជ្ញាធរឃុំបន្ថែមទៀត។ លោក សុខ រចនា បន្តថា៖ «ការចូលរួមរបស់ប្រជាពលរដ្ឋ គឺសំខាន់ណាស់។ ខ្ញុំគិតថាកម្លាំងប៉ុស្តិ៍យើងមិនច្រើនទេ ហើយអ៊ីចឹងសម្រាប់ការក្តាប់ព័ត៌មាន និងក្តាប់សភាពការណ៍ផ្សេងៗ ក៏មានចន្លោះខ្វះខាតដែរ បើសិនពួកគាត់(ពលរដ្ឋ)មិនចូលរួម។  អ៊ីចឹងបើសិនជាពួកគាត់ចូលរួមហ្នឹងរាល់ការក្តាប់សភាពការណ៍ផ្សេងៗ ក៏ដូចជាការរាយការណ៍ផ្សេងៗ បានជុំល្អ»។

 

លោក សុខ រចនា ក៏បានគូសបញ្ជាក់ដែរថា រាល់ការណ៍របស់ប្រជាពលរដ្ឋ គឺត្រូវបានអាជ្ញាធរលាក់ទុកជាការសម្ងាត់ ដើម្បីធានាសុវត្ថិភាព និងជំរុញការចូលរួមពីពលរដ្ឋបន្ថែមទៀត ដើម្បីធ្វើយ៉ាងណាឱ្យភូមិឃុំ កាន់តែមានសុវត្ថិភាព និងសណ្តាប់ធ្នាប់។ ទន្ទឹមនឹងនេះលោកមេប៉ុស្តិ៍ស្ដីទីនៃប៉ុស្តិ៍នគរបាលឃុំកណ្តោល ក៏បានតាំងចិត្ត​ក្នុងការទប់ស្កាត់ និងបង្ក្រាបរាល់បទល្មើសផ្សេងៗនៅក្នុងឃុំ ឱ្យកាន់តែល្អបន្ថែមទៀត ៕

 

​អានអត្ថបទពាក់ព័ន្ធផ្សេងទៀត៖ យុវជនសកម្ម សេវាល្អ