កន្លងមក រដ្ឋាភិបាលចិនបានអនុញ្ញតឱ្យតែស្ត្រីដែលរៀបការហើយប៉ុណ្ណោះអាចសម្រាលនិងមានកូនបានដោយស្របច្បាប់។ យ៉ាងណាមិញក្នុងរយៈពេលប៉ុន្មានឆ្នាំចុងក្រោយនេះ អត្រាអាពាហ៍ពិពាហ៍ និងកំណើតបានធ្លាក់ចុះដល់កម្រិតដែលមិនធ្លាប់មានពីមុន ដែលបានជំរុញឱ្យអាជ្ញាធរខេត្តមួយចំនួនកែប្រែច្បាប់ឆ្នាំ២០១៩ អនុញ្ញាតឱ្យអ្នកនៅលីវអាចមានកូនដោយស្របច្បាប់។ 
 

បើតាមការប្រកាសរបស់អាជ្ញាធរសុខាភិបាលនៅខេត្តស៊ីឈួន ចាប់ពីថ្ងៃទី ១៥ ខែកុម្ភៈទៅ គូស្វាមីភរិយាដែលរៀបការហើយ និងពលរដ្ឋដែលមិនទាន់រៀបការនឹងត្រូវបានអនុញ្ញាតឱ្យចុះឈ្មោះមានកូនដោយស្របច្បាប់នៅខេត្តស៊ីឈួនដោយមិនរឹតបន្តឹងលើចំនួនកូនដែលពលរដ្ឋអាចមាន។ នេះបើតាមការចុះផ្សាយរបស់ទីភ្នាក់ងារព័ត៌មាន ​Reuters នៅថ្ងៃទី៣០ ខែមករា។
 

ក្នុងសេចក្តីថ្លែងការណ៍មួយនៅវេបសាយរបស់ខ្លួន​ គណៈកម្មការសុខាភិបាលខេត្តស៊ីឈួន បញ្ជាក់ថា វិធានការនេះមានគោលបំណងលើកកម្ពស់កំណើនពលរដ្ឋរយៈពេលវែងឱ្យមានតុល្យភាព។ យ៉ាងណា​មិញ​ មុនដល់ថ្ងៃទី១៥ ខែកុម្ភៈ ​គណៈកម្មការសុខាភិបាលខេត្តស៊ីឈួន​អនុញ្ញាត​ឱ្យ​តែ​គូ​ស្វាមី​ភរិយាដែលរៀបការស្របច្បាប់មានកូនតែពីរ​នាក់​ប៉ុណ្ណោះ។
 

​គួរបញ្ជាក់ថា ចំនួនប្រជាជនចិនបានធ្លាក់ចុះកាលពីឆ្នាំមុន ដែលជាការធ្លាក់ចុះជាលើកដំបូងក្នុងរយៈពេលជាងប្រាំមួយទសវត្សរ៍មកនេះ។ ការធ្លាក់ចុះនៃកំណើនពលរដ្ឋនេះ កំពុងជំរុញឱ្យអាជ្ញាធរថ្នាក់ជាតិ និងតាមមូលដ្ឋាន ដាក់ចេញនូវគោលនយោបាយលើកទឹកចិត្ត និងវិធានការជំរុញឱ្យពលរដ្ឋបន្តការយកកូន។
 

កន្លងមក គូស្វាមីភរិយាដែលបានចុះឈ្មោះរៀបការស្របច្បាប់ជាមួយអាជ្ញាធរមូលដ្ឋាន បានទទួលធានារ៉ាប់រងមាតុភាពដើម្បីរ៉ាប់រងថ្លៃចំណាយនៅមន្ទីរពេទ្យពេលមានកូន និងអនុញ្ញាតឱ្យស្ត្រីដែលរៀបការរួចអាចឈប់សម្រាកលំហែមាតុភាពនិងទទួលបានប្រាក់បៀវត្សរ៍ក្នុងអំឡុងពេលសម្រាលកូនរួច។ ខណៈចង់ជំរុញអត្រាកំណើន រដ្ឋាភិបាលចិនមានទំនោរបន្តអត្ថប្រយោជន៍ទាំងនេះឱ្យទាំងស្រ្តីនិងបុរសដែលនៅលីវពេលមានកូនក្នុងខេត្តស៊ីឈួនផងដែរ។ 
 

ការធ្លាក់ចុះនៃចំនួនប្រជាជនក្នុងប្រទេសចិននេះ ជារឿងដែលមិនធ្លាប់មានពីមុនមក ដ្បិតប្រទេសនេះគឺជាប្រទេសដែលមានចំនួនប្រជាជនច្រើនបំផុតលើពិភពលោក។ ការធ្លាក់ចុះនៃចំនួនប្រជាជននេះ ភាគច្រើនកើតចេញពីគោលនយោបាយមានកូនកូនតែមួយរបស់ចិនដែលបានអនុវត្តក្នុងចន្លោះឆ្នាំ១៩៨០ និង ២០១៥៕