ដោយ៖ សែម ប្រាក់ដាវ

ខេត្តកំពង់ស្ពឺ មានតំបន់ទេសចរណ៍សរុបចំនួន ២៥កន្លែង។ រយៈពេល៥ឆ្នាំ ទេសចរជាតិ បានទៅទស្សនារមណីយដ្ឋាននានាក្នុងខេត្តកំពង់ស្ពឺប្រមាណ ១,៥លាននាក់។ 

 

ខេត្តកំពង់ស្ពឺ មានតំបន់ទេសចរណ៍ប្រវត្តិសាស្ត្រ៤កន្លែង ទេសចរណ៍ធម្មជាតិកែច្នៃ ៥កន្លែង និងកសិ-ទេសចរណ៍ ៣កន្លែង។  ជាមួយគ្នានេះ តំបន់ទេសចរណ៍ប្រវត្តិសាស្ត្រទាំង៤កន្លែង មានល្អាងបុរាណវិទ្យាភ្នំចាស់,បុរាណវិទ្យាភ្នំព្រះ, រមណីយដ្ឋានប្រវត្តិសាស្ត្រតេទឹកពុះ និងរមណីយដ្ឋានប្រាសាទភ្នំក្អែកពង។

 

យ៉ាងណាមិញ ខេត្តកំពង់ស្ពឺក៏មានកន្លែងផ្សងព្រេងពីរដែរ គឺភ្នំខ្នងផ្សារ និងភ្នំឱរ៉ាល់។ បន្ថែមពីនេះ ខេត្តកំពង់ស្ពឺដែលនៅជិតភ្នំពេញ និងមានតំបន់ទេសចរណ៍ព្រៃភ្នំច្រើន មានសន្ទុះភ្ញៀវទេសចរខ្លាំង រហូតប្ដូរមុខមាត់ពីតំបន់ឆ្លងកាត់ ក្លាយជាទិសដៅទេសចរណ៍យ៉ាងសំខាន់ផងដែរ។

 

សូមបញ្ជាក់ដែរ ភ្ញៀវទេសចរភាគច្រើននិយមទៅកម្សាន្តនៅទឹកធ្លាក់ជ្រាវ ឱទ្យានជាតិគិរីរម្យ ភ្នំខ្នងផ្សា និងតាមតំបន់ទេសចរធម្មជាតិមួយចំនួនទៀត។ ក្រៅពីនេះ  មន្រ្តីជំនាញ និងអាជីវករ ដែលពឹងផ្អែកវិស័យទេសចរណ៍ នឹងខិតខំ អភិវឌ្ឍតំបន់ទេសចរណ៍ឱ្យកាន់តែស្រស់ស្អាត និងមានសេវាកម្មច្រើនជាងនេះ៕