«ក្តីរំពឹងរបស់ខ្ញុំគឺមិនទាមទារឱ្យកីឡាករក្រុមនាងខ្ញុំដណ្តើមបានមេដាយ មាស ប្រាក់ ឬក៏សំរឹទ្ធនោះទេ គ្រាន់តែថាខ្ញុំនឹងព្យាយាមបង្វឹកកីឡាករ-កីឡាការិនីឱ្យអស់ពីសមត្ថភាព តាមលទ្ធភាពដែលយើងធ្វើទៅបានក្នុងរយៈពេលពី ២ទៅ៣ខែខាងមុខ»។ អ្នកនាង ងួន ច័ន្ទបូរមី បញ្ជាក់ក្នុងបទសម្ភាសផ្ទាល់ជាមួយសារព័ត៌មានថ្មីៗដូច្នេះ នៅថ្ងៃទី២២ ខែកុម្ភៈ នាទីលានហ្វឹកហាត់ ក្នុងបរិវេណវិទ្យាល័យព្រះស៊ីសុវត្ថិ។

 

 

ក្នុងពេលកំពុងបង្វឹកកូនក្រុមនោះ អ្នកគ្រូ ងួន ច័ន្ទបូរមី បន្ថែមថា កីឡាថ្មីនេះ មានលក្ខណៈស្រដៀងគ្នាទៅនឹងសីដក់ ក៏ដូចជាបាល់ទាត់ និងវាយកូនបាល់លើតុដែរ ទាំងការគិតពិន្ទុ បច្ចេកទេសលេង គឺសឹងតែដូចគ្នាតែម្តង។ ចំពោះកីឡាប្រភេទថ្មីនេះ អតីតកីឡាការិនីសីដក់ជម្រើសជាតិកម្ពុជា ចាន់បូរមី ថា កូនក្រុមខ្លួន នឹងធ្វើឱ្យបានល្អ សម្រាប់ស៊ីហ្គេម២០២៣នេះ។

 

អ្នកនាង ងួន ច័ន្ទបូរមី និយាយថា៖«យើងដឹងស្រាប់ហើយថាវាជាកីឡាប្រភេទថ្មី តែយើងបានត្រៀមរួចរាល់ហើយ នូវពេលដឹងថាកីឡានេះបានដាក់បញ្ចូលក្នុងការប្រកួតស៊ីហ្គេមលើកទី៣២ នៅកម្ពុជា។ ទោះបីមានរយៈពេលខ្លី តែការហ្វឹកហាត់មើលឃើញថា មានការរីកចំរើនខ្លាំងដោយសារកីឡាករ-កីឡាការិនីយើងមានគ្រឹះស្រាប់»។

 

គួបញ្ជាក់ថា អត្តពលិកកីឡាបាល់ទាត់លើតុ(Teqball)ជម្រើសជាតិកម្ពុជាបច្ចុប្បន្ន មានកីឡាករ ៥រូប និងកីឡាការិនី ៥រូប កំពុងហ្វឹកហាត់នៅទីលានបាល់ទាត់លើតុ ក្នុងបរិវេណវិទ្យាល័យព្រះស៊ីសុវត្ថិ៕