នៅក្នុងសុន្ទរកថាបើកកិច្ចប្រជុំកំពូលនៃប្រទេសអភិវឌ្ឍតិចតួចបំផុតរបស់អង្គការសហប្រជាជាតិ (LDC) នៅប្រទេសកាតា លោក អាន់តូនីញ៉ូ ហ្គូតេរ៉េស បានជំរុញឱ្យប្រទេសអ្នកមានផ្តល់ប្រាក់ចំនួន៥០០ពាន់លានដុល្លារជារៀងរាល់ឆ្នាំ ដើម្បីជួយក្រីក្រជាប់ក្នុងវិបត្តិបំណុលដែលព្យាយាមជំរុញកំណើនសេដ្ឋកិច្ច វិស័យសុខភាព និងការអប់រំក្នុងប្រទេស។
 

កិច្ចប្រជុំកំពូល LDC នេះ ជាធម្មតាត្រូវបានធ្វើឡើងរៀងរាល់១០ឆ្នាំម្តង ដែលត្រូវរៀបចំនៅឆ្នាំ២០២១កន្លងទៅ។ យ៉ាងណាមិញ ដោយសារជំងឺកូវីដ-១៩ កិច្ចប្រជុំកំពូលត្រូវបានពន្យារពេលរហូតដល់ឆ្នាំ២០២៣។ 
 

ក្នុងកិច្ចប្រជុំនៅរដ្ឋធានីដូហា អាហ្វហ្កានីស្ថាន និងមីយ៉ាន់ម៉ា ដែលជាប្រទេសក្រីក្របំផុតចំនួនពីរ មិនត្រូវបានអញ្ជើញឱ្យចូលរួមឡើង ដ្បិតរដ្ឋាភិបាលនៃប្រទេសទាំងពីរមិនត្រូវបានទទួលស្គាល់ដោយ UN ។
 

«យើងដឹងយ៉ាងច្បាស់ពីវិសមភាពដែលបង្កើតឡើងដោយប្រព័ន្ធសេដ្ឋកិច្ច និងហិរញ្ញវត្ថុសកលដែលមិនយុត្តិធម៌។ ការអភិវឌ្ឍសេដ្ឋកិច្ចមានការលំបាក ដ្បិតប្រទេសនានាខ្វះធនធាន លិចលង់ក្នុងបំណុល និងកំពុងតស៊ូជាមួយភាពអយុត្តិធម៌នៃការឆ្លើយតបមិនស្មើភាពគ្នាប្រឆាំងជំងឺកូវីដ-១៩»។ លោក ហ្គូតេរ៉េស បានលើកឡើងបែបនេះក្នុងសុន្ទរកថាបើកកិច្ចប្រជុំ។ 
 

លើសពីនេះ ប្រមុខ UN ក៏បានសង្កត់ធ្ងន់ថា ប្រទេសក្រីក្រកំពុងប្រយុទ្ធប្រឆាំងនឹងគ្រោះមហន្តរាយអាកាសធាតុដែលខ្លួនមិនបានបង្ក ខណៈការចំណាយខ្ពស់ខ្លាំង ហើយជំនួយផ្នែកហិរញ្ញវត្ថុបានធ្លាក់ចុះ ស្របពេលក្រុមហ៊ុនឥន្ធនៈហ្វូស៊ីលទទួលបានប្រាក់ចំណេញយ៉ាងច្រើន ខណៈដែលមនុស្សរាប់លាននាក់នៅក្នុងប្រទេសក្រីក្រកំពុងខ្វះខាតអាហារ។
 

កន្លងមក ប្រទេសអ្នកមានក៏ធ្លាប់បានសន្យាដែរពីការប្រមូលជំនួយដែរក្នុងការប្រយុទ្ធប្រឆាំងនឹងការប្រែប្រួលអាកាសធាតុ។ លោក ហ្គូតេរ៉េស ប្រកាសថា លោកនឹងបន្តជំរុញប្រទេសអ្នកមានឱ្យគោរពតាមការសន្យាកន្លងមក៕