ហុងឌូរ៉ាស និងចិនបានភ្ជាប់ទំនាក់ទំនងការទូតជាផ្លូវការ នៅថ្ងៃទី២៦ ខែមីនា ក្រោយពីផ្តាច់ទំនាក់ទំនងការទូតជាមួយកោះតៃវ៉ាន់ ដែលមានជាច្រើនទសវត្សរ៍កន្លងមក។ ក្រោយការកសាងទំនាក់ទំនងការទូតផ្លូវការជាមួយប្រទេសនៅអាម៉េរិកកណ្តាលមួយនេះ ចិនថា មិនបានដាក់លក្ខខណ្ឌសម្រាប់ហុងឌូរ៉ាសឡើយ។ 

 

«ការបង្កើតទំនាក់ទំនងការទូតជាមួយចិន ជាសេចក្តីសម្រេចនយោបាយដោយហុងឌូរ៉ាសលើមូលដ្ឋានគោលការណ៍ចិនតែមួយ និងដោយគ្មានបុរេលក្ខខណ្ឌឡើយ»។ លោកស្រី Mao Ning អ្នកនាំពាក្យក្រសួងការបរទេសចិន បានសង្កត់ធ្ងន់បែបនេះ នៅថ្ងៃទី២២៧ ខែមីនា ដោយបន្តថា​ ចិន តែងគោរពការសម្រេចចិត្តរបស់ហុងឌូរ៉ាស។ 

 

ទន្ទឹមនេះ មន្រ្តីក្រសួងការបរទេសចិន ក៏បានបញ្ជាក់ផងដែរថា រដ្ឋាភិបាលក្រុងប៉េកាំង នឹងគោរពតាមស្មារតីនៃការគោរព សមភាព ផលប្រយោជន៍ទៅវិញទៅមក ការអភិវឌ្ឍរួម និងការលើកតម្កើងកិច្ចសហប្រតិបត្តិការដែលផ្តល់ផលប្រយោជន៍រួមទៅវិញទៅមកលើគ្រប់វិស័យជាមួយហុងឌូរ៉ាស រួមទាំងចូលរួមចំណែកលើការអភិវឌ្ឍសង្គម និងសេដ្ឋកិច្ច ដើម្បីជីវភាពរបស់ប្រជាជនកាន់តែល្អប្រសើរ។

 

ជុំវិញការភ្ជាប់ទំនាក់ទំនងការទូតខាងលើ ប្រធានាធិបតីតៃវ៉ាន់ លោកស្រី Tsai Ing-wen នៅថ្ងៃទី២៦ ខែមីនា បានលើកឡើងថា រដ្ឋាភិបាលក្រុងតៃប៉ិ នឹងមិនចូលរួមប្រជែងដោយគ្មានន័យលើការទូតដុល្លាររបស់ចិន ក្នុងការទាក់ទាញទំនាក់ទំនងការទូតពីប្រទេសផ្សេងឡើយ។

 

ក្នុងសន្និសីទសារព័ត៌មាននៅថ្ងៃទី២៧ ខែមីនា លោកស្រី Mao Ning ក៏បានតបនឹងសម្តីរបស់ប្រធានាធិបតីតៃវ៉ាន់ផងដែរ ដោយអះអាងថា អាជ្ញាធរបក្ស​វឌ្ឍនភាព​ប្រជាធិបតេយ្យ (DPP) ជាអ្នកជំនាញផ្នែកការទូតលុយដុល្លារ។ បើតាមអ្នកនាំពាក្យក្រសួងការបរទេសចិន ការប៉ុនប៉ងប្រកាសឯករាជ្យរបស់តៃវ៉ាន់ នឹងមិនទទួលបានជោគជ័យឡើយ។ បក្ស​វឌ្ឍនភាព​ប្រជាធិបតេយ្យ ជាបក្សរបស់ប្រធានាធិបតីតៃវ៉ាន់។ 

 

សូមបញ្ជាក់ថា ការទូតដុល្លារសំដៅដល់ការប្រើប្រាស់ការវិនិយោគ ជំនួយហិរញ្ញវត្ថុ និងការធ្វើពាណិជ្ជកម្មជាមួយរដ្ឋមួយ ដើម្បីទាក់ទាញការទទួលស្គាល់ផ្លូវទូត ឬឥទ្ធិពលលើឆាកអន្តរជាតិ៕