សេដ្ឋកិច្ចអន្តរជាតិ
អន្តរជាតិ
មជ្ឈិមបូព៌ាប្រឈមមុខនឹងបញ្ហាស្បៀង ខណៈតម្លៃអាហារកើនឡើង 02, Apr 2023 , 10:19 pm
× នៅមជ្ឈិមបូព៌ា បញ្ហាប្រឈមតម្លៃស្បៀងអាហារកំពុងក្លាយជាវិបត្តិ។ បើតាមទិន្នន័យ មានប្រទេសចំនួន ៥ ដែលតម្លៃអាហារបានកើនឡើងជាង ៦០ភាគរយ។ យោងតាមកាសែតធុរកិច្ចអារ៉ាប់ អតិផរណាតម្លៃស្បៀងអាហារ បានរុញច្រានមនុស្សជាង ៤០លាននាក់នៅក្នុងតំបន់នេះ ឱ្យធ្លាក់ចូលទៅក្នុងវិបត្តិសន្តិសុខស្បៀង។
នៅអ៊ីរ៉ង់ ទួរគី និងអេហ្ស៊ីប តម្លៃអាហារទាំងអស់បានកើនឡើងជាង ៦០ភាគរយ ខណៈនៅប្រទេសលីបង់ តម្លៃម្ហូបអាហារក៏បានកើនឡើង ១៤០ភាគរយ។ ប្រជាជនជាច្រើនអាចទិញបានត្រឹមតែមួយភាគបួននៃអាហារ ដែលពួកគេធ្លាប់បរិភោគតែប៉ុណ្ណោះ។
ដំណាំនៅមជ្ឈិមបូព៌ាកាលពីឆ្នាំមុន បានជួបវិបត្តិដោយសារគ្រោះរាំងស្ងួត។ គ្រោះរាំងស្ងួតបានកើតឡើងម្តងទៀត នៅក្នុងស្ថានភាពភូមិសាស្ត្រនយោបាយពិភពលោក ដែលងាយនឹងបង្កជាហេតុ ដោយបង្កើតឱ្យមានផលប៉ះពាល់ទ្វេដង ដល់ការផ្គត់ផ្គង់ស្បៀងអាហារនៅតំបន់នេះ។
កាសែតអារ៉ាប់បានឱ្យដឹងថា នៅមជ្ឈិមបូព៌ានិងអាហ្វ្រិកខាងជើង មានអាហាររហូតដល់ ៩០ភាគរយ ត្រូវបាននាំចូល។ ជម្លោះមិនចេះចប់រវាងរុស្ស៊ី និងអ៊ុយក្រែន បានរុញច្រានប្រទេសមួយចំនួននៅតំបន់នេះ ឱ្យស្ថិតក្នុងស្ថានភាពលំបាក។ តួយ៉ាងដូចជាអេហ្ស៊ីប ស្រូវសាលីភាគច្រើនត្រូវបាននាំចូលពីរុស្ស៊ី និងអ៊ុយក្រែន ។ បច្ចុប្បន្នប្រជាជននៅទីនេះកំពុងជួបនូវស្ថានភាពតម្លៃម្ហូបអាហារប្រែប្រួល ពីមួយថ្ងៃទៅមួយថ្ងៃ។
អតិផរណាតម្លៃស្បៀង មិនត្រឹមតែជាការព្រួយបារម្ភចំពោះប្រទេសអភិវឌ្ឍន៍មធ្យមនៅមជ្ឈិមបូព៌ាប៉ុណ្ណោះទេ សូម្បីតែប្រទេសអ្នកមានដែលនៅឈូងសមុទ្រ ក៏រងឥទ្ធិពលពីវិបត្តិស្បៀងឡើងថ្លៃផងដែរ។ ថ្មីៗនេះ មន្ត្រីក្នុងប្រទេសអារ៉ាប់រួម បានធានាដល់ប្រជាជនរបស់ពួកគេថា នឹងមិនបណ្តោយឱ្យតម្លៃអាហារសំខាន់ៗបន្តកើនថ្លៃទៀតឡើយ។ បច្ចុប្បន្ន ប្រទេសនេះ ត្រូវដាក់ការត្រួតពិនិត្យតម្លៃលើផលិតផលអាហារសំខាន់ៗដូចជា ប្រេងឆា ស៊ុត ទឹកដោះគោ អង្ករ ស្ករ ឬនំប៉័ង។
ស្របពេលដែលតម្លៃអាហារខ្ពស់នាពេលបច្ចុប្បន្ន បានធ្វើឱ្យគ្រួសារជាច្រើននៅមជ្ឈិមបូព៌ាមានការព្រួយបារម្ភនៅថ្ងៃ បុណ្យរ៉ាម៉ាដានឆ្នាំនេះ។ ពួកគេនឹងមិនត្រឹមតែតមអាហារនៅពេលថ្ងៃប៉ុណ្ណោះទេ ថែមទាំងនៅពេលល្ងាចទៀតផង។
បើតាមកាសែត Al Jazeera របស់កាតា នៅក្នុងប្រទេសលីបង់ តួលេខ៨០ភាគរយនៃចំនួនប្រជាជន ស្ថិតនៅក្នុងស្ថានភាពមិនមានលទ្ធភាពទទួលទានអាហារ បន្ទាប់ពីការតមអាហារមួយថ្ងៃ។ ចំណែកនៅស៊ីរី ៩០ភាគរយនៃប្រជាជន រស់នៅក្រោមបន្ទាត់នៃភាពក្រីក្រ៕
Tag:
មជ្ឈិមបូព៌ា
ស្បៀងអាហារ
© រក្សាសិទ្ធិដោយ thmeythmey.com