វិញ្ញាសាអុកចត្រង្គបុរស ៣ទល់៣ មានលោក សុខ លឹមហេង លោក ឈាវ បូរ៉ា និងលោក ជា ស៊ីដេត តំណាងឱ្យកម្ពុជា។ កីឡាករអុកកម្ពុជាទាំង៣រូបនេះ បានទទួលជ័យជម្នះលើការប្រកួតក្ដាទី១ នៃជុំទី៤ ដោយលទ្ធផល ឈ្នះ ១ និងស្មើ ២ លើជម្រើសជាតិម៉ាឡេស៊ី ។ ក្នុងនោះកីឡាករ ជា ស៊ីដេត យកឈ្នះលើកីឡាករម៉ាឡេស៊ី ខណៈសុខ លឹមហេង និង ឈាវ បូរ៉ា បានត្រឹមស្មើជាមួយកីឡាករម៉ាឡេស៊ី។ 
 

ដោយឡែកក្ដារទី២នៅរសៀលនេះ កម្ពុជា បន្តយកឈ្នះទៀត ដោយលទ្ធផល២ និងស្មើ១ក្ដារ ។ កីឡាករ ជា ស៊ីដេត និង សុខ លឹមហេង យកឈ្នះគូប្រកួត ខណៈ ឈាវ បូរ៉ា បានត្រឹមស្មើ។ កម្ពុជា ទទួលបាន ១ពិន្ទុបន្ថែមទៀតពីជ័យជម្នះនេះ ។
 

វិញ្ញាសាបុរស ៣ទល់៣ នេះ ក្រុមអត្តពលិកកម្ពុជារកបាន ៣ពិន្ទុរួចហើយ ពីការប្រកួតជុំទី១ ជុំទី២ និងជុំទី៣ ដោយយកឈ្នះលើមីយ៉ាន់ម៉ា វៀតណាម និងហ្វីលីពីន ។ ការប្រកួតត្រូវធ្វើឡើងចំនួន ៦ជុំ ដើម្បីប្រជែងយកមេដាយ។ 

កម្ពុជា ត្រូវបន្តប្រកួតជុំទី៥ និងទី៦ ជាមួយឡាវ និងថៃ ទៀត នៅថ្ងៃទី៣ ឧសភា។ ការប្រកួតលើវិញ្ញាសាអុកចត្រង្គបុរស ៣ទល់៣ មានប្រទេសចូលរួមដូចជា៖ កម្ពុជាម្ចាស់ផ្ទះ, ថៃ, ឡាវ, មីយ៉ាន់ម៉ា, ម៉ាឡេស៊ី, ហ្វីលីពីន និងវៀតណាម៕