មុនការជ្រើសរើសនាយករដ្ឋមន្រ្តីថៃថ្មីដោយសភាទាំងពីរថ្នាក់ លោក Pita Limjaroenrat មេដឹកនាំបក្សឆ្ពោះទៅមុខ បានជួបជាមួយអ្នកគាំទ្រនៅពីមុខផ្សារទំនើប CentralWorld នៅផ្លូវប្រសព្វ Ratchaprasong ក្នុងថ្ងៃទី៩ ខែកក្កដា។​

 

ថ្លែងទៅកាន់អ្នកគាំទ្រខ្លួន ដែលមានសំលៀកបំពាក់ពណ៌ទឹកក្រូច និងមានកាន់ឆត្រផងនោះ លោក Pita បានអះអាងថា ការជ្រើសរើសនាយករដ្ឋមន្រ្តីថៃថ្មី មិនមែនជាការជ្រើសយករូបលោក ឬបក្សឆ្ពោះទៅមុខឡើយ ប៉ុន្តែវាជាការជ្រើសរើសដោយផ្អែកលើប្រព័ន្ធប្រជាធិបតេយ្យ។ 

 

មិនតែប៉ុណ្ណោះ លោក Pita បានស្នើឱ្យសមាជិកព្រឹទ្ធសភាបោះឆ្នោតគាំទ្រខ្លួន ដើម្បីមិនប្រឆាំងឆន្ទៈប្រជាជន ក៏ដូចជាសម្រាប់ប្រជាធិបតេយ្យ និងការវិលត្រលប់ទៅរកប្រក្រតីភាពនៃនយោបាយថៃផង។ 

 

កន្លងមក លោក Pita បានរងពាក្យបណ្តឹងរបស់គូប្រជែងជុំវិញការកាន់កាប់ភាគហ៊ុនក្នុងក្រុមហ៊ុន ប្រព័ន្ធផ្សព្វផ្សាយ ITV Public Company។ ជុំវិញបញ្ហានេះ គណៈកម្មការរៀបចំការបោះឆ្នោតថៃ ត្រូវសម្រេចលើការស្នើឱ្យតុលាការធម្មនុញ្ញកំណត់ពីភាពខុសច្បាប់របស់លោក Pita ក្នុងការកាន់កាប់ភាគហ៊ុននោះ។ ជាការឆ្លើយតប បេក្ខជននាយករដ្ឋមន្រ្តីថៃ បានអះអាងថា ជំហររបស់គណៈកម្មការរៀបចំការបោះឆ្នោតថៃ ជារឿងធម្មតា និងដូចការរំពឹងទុក។ នេះបើតាមការចុះផ្សាយរបស់សារព័ត៌មាន Thai PBS។ 

 

មិនតែប៉ុណ្ណោះ មេដឹកនាំបក្សរូបនេះ ក៏បានឆ្លើយសំណួរជុំវិញវត្តមានអ្នកគាំទ្រលោកនៅមុខសភា ក្នុងថ្ងៃទី១៣ ខែកក្កដា ដែលជាថ្ងៃរដ្ឋសភា និងព្រឹទ្ធសភារើសនាយករដ្ឋមន្រ្តីថៃថ្មីផង។ បើតាមលោក Pita ប្រជាជនមានសិទ្ធិបញ្ចេញមតិរបស់ខ្លួន ហើយលោកមិនបានគិតឡើយថា វត្តមានរបស់ប្រជាជននៅមុខសភា នឹងដាក់សម្ពាធលើសមាជិកព្រឹទ្ធសភា។

 

មកទល់ពេលនេះ លោក​ Pita មានសំឡេងគាំទ្រ ៣១២កៅអីរួចហើយ តាមរយៈសម្ព័ន្ធបក្សនយោបាយចំនួន ៨។ យ៉ាងណាមិញ អ្នកនយោបាយវ័យក្មេងរូបនេះ ត្រូវការសំឡេងរហូតដល់ ៣៧៦កៅអីឯណោះ ពីព្រឹទ្ធសភា និងរដ្ឋសភា ដែលមានសំឡេងសរុប៧៥០ ដើម្បីក្លាយជាប្រមុខរដ្ឋាភិបាលថៃថ្មី។ 

 

កន្លងមក សមាជិកព្រឹទ្ធសភាមួយចំនួន បានប្រកាសដកការគាំទ្រលើលោក​ Pita វិញ ដោយសារតែគោលនយោបាយរបស់បក្សក្នុងការកែប្រែច្បាប់ប្រមាថព្រះមហាក្សត្រ។ ប្រធានរដ្ឋសភាថៃថ្មី Wan Muhamad Noor Matha ក៏ធ្លាប់លើកឡើងផងដែរថា ការបោះឆ្នោតរើសនាយករដ្ឋមន្រ្តី អាចធ្វើឡើងជាច្រើនជុំ៕