ខណៈមានបញ្ហាចម្រូងចម្រាសជុំវិញយន្តហោះចារកិច្ចរបស់អាម៉េរិក​ កូរ៉េខាងជើងក៏បាញ់មីស៊ីលមួយគ្រាប់ បន្ទាប់ពីខកខានយូរមកហើយ។ សេនាធិការចម្រុះកូរ៉េខាងត្បូង (JCS) បានរាយការណ៍ថា ខ្លួនចាប់បានសញ្ញានៃការបាញ់មីស៊ីលប៉ាលីស្ទិកមួយគ្រាប់ទៅក្នុងសមុទ្រខាងកើត។ ប៉ុន្តែកូរ៉េខាងត្បូង មិនទាន់បញ្ជាក់ឡើយ ថាតើមីស៊ីលប៉ាលីស្ទិកនោះ ជាមីស៊ីលប្រភេទណា។ 

 

មុនការបាញ់មីស៊ីលខាងលើ ប្អូនស្រីមេដឹកនាំកូរ៉េខាងជើង លោកស្រី គីម យ៉ូចុង នៅថ្ងៃទី១១ ខែកក្កដា បានព្រមានអាម៉េរិក ដែលហ៊ានឱ្យយន្តហោះចារកិច្ចហោះចូលតំបន់សេដ្ឋកិច្ចផ្តាច់មុខរបស់ខ្លួន (EEZ)។ ទន្ទឹមនឹងនេះ ទីក្រុងព្យុងយ៉ាង ក៏គំរាមបាញ់ទម្លាក់យន្តហោះនោះទៀតផង។ កូរ៉េខាងជើង បានបាញ់មីស៊ីលលើកចុងក្រោយ នៅថ្ងៃទី១៥ ខែមិថុនា។ 

 

សូមបញ្ជាក់ថា ក្នុងសប្តាហ៍នេះ វានឹងមានកិច្ចប្រជុំថ្នាក់ដឹកនាំអង្គការណាតូ និងកិច្ចប្រជុំរដ្ឋមន្រ្តីការបរទេសអាស៊ាន។ ថ្នាក់ដឹកនាំកូរ៉េខាងត្បូង នឹងលើកយកបញ្ហាកូរ៉េខាងជើងទៅពិភាក្សានៅក្នុងកិច្ចប្រជុំទាំងពីរនេះ ដើម្បីដាក់សម្ពាធលើរដ្ឋាភិបាលក្រុងព្យុងយ៉ាងឱ្យបញ្ឈប់កម្មវិធីអាវុធនុយក្លេអ៊ែរ៕