អន្តរជាតិ
អារ៉ាប៊ីសាអូឌីត ក្លាយជាសមាជិកទី៥១ នៃសន្ធិសញ្ញា TAC របស់អាស៊ាន 12, Jul 2023 , 5:29 pm
× អារ៉ាប៊ីសាអូឌីត នៅថ្ងៃទី១២ ខែកក្កដា បានចុះហត្ថលេខាចូលជាសមាជិកទី៥១ នៃសន្ធិសញ្ញាមិត្តភាព និងកិច្ចសហប្រតិបត្តិការ (TAC) របស់អាស៊ានជាផ្លូវការ ក្នុងអំឡុងកិច្ចប្រជុំរដ្ឋមន្រ្តីការបរទេសអាស៊ាន នៅក្រុងហ្សាការតា ឥណ្ឌូណេស៊ី។
កន្លងមក ប្រទេសចំនួន ៥០រួចមកហើយ បានក្លាយជាសមាជិកសន្ធិសញ្ញាមិត្តភាព និងកិច្ចសហប្រតិបត្តិការ ដោយអ៊ុយក្រែនជាសមាជិកចុងក្រោយ។ ក្នុងអំឡុងកិច្ចប្រជុំថ្នាក់រដ្ឋមន្រ្តីការបរទេសអាស៊ាន នៅក្រុងហ្សាការតា នៅថ្ងៃទី១២ ខែកក្កដា អារ៉ាប៊ីសាអូឌីត បានក្លាយជាសមាជិកទី៥១ នៃសន្ធិសញ្ញា TAC។
«ការចុះហត្ថលេខានេះ បង្ហាញពីការប្តេជ្ញាដ៏ខ្លាំងក្លារបស់អារ៉ាប៊ីសាអូឌីត ក្នុងការគោរពតម្លៃ និងគោលការណ៍របស់អាស៊ាន ដែលមានចែងក្នុងសន្ធិសញ្ញា TAC»។ រដ្ឋមន្រ្តីការបរទេសឥណ្ឌូណេស៊ី លោកស្រី Retno Marsudi បានបញ្ជាក់បែបនេះនៅក្នុងពេលចាប់ផ្តើមនៃពិធីចុះហត្ថលេខាចូលជាសមាជិកសន្ធិសញ្ញា TAC។
ទន្ទឹមនេះ ប្រមុខការទូតឥណ្ឌូណេស៊ី បានបន្ថែមថា នេះជាការប្តេជ្ញាលើកិច្ចសហប្រតិបត្តិការ ការគោរពច្បាប់អន្តរជាតិ និងការរួមចំណែកចំពោះសន្តិភាព ស្ថិរភាពក្នុងតំបន់អាស៊ីអាគ្នេយ៍ និងតំបន់លើសពីនេះ។ នេះបើតាមការចុះផ្សាយរបស់សារព័ត៌មាន Jakarta Globe។
សន្ធិសញ្ញា TAC ជាក្រមមួយ ដែលមានចងកាតព្វកិច្ចផ្នែកច្បាប់សម្រាប់រដ្ឋ និងរដ្ឋនៅក្នុងតំបន់ ជាពិសេសក្នុងគោលបំណងរួមរស់ជាមួយគ្នាប្រកបដោយសន្តិភាព និងកិច្ចសហប្រតិបត្តិការប្រកបដោយមិត្តភាព។
សូមបញ្ជាក់ថា សន្ធិសញ្ញាមិត្តភាព និងកិច្ចសហប្រតិបត្តិការ ត្រូវបានបង្កើតឡើងនៅក្នុងឆ្នាំ ១៩៧៦។ កន្លងមក សន្ធិសញ្ញានេះ ត្រូវបានកែប្រែជាច្រើនលើក ដើម្បីអនុញ្ញាតឱ្យរដ្ឋក្រៅតំបន់អាស៊ីអាគ្នេយ៍ អាចចូលជាសមាជិកបាន។ នៅពេលខាងមុខ វាអាចមានប្រទេសជាច្រើនទៀតចូលជាសមាជិកសន្ធិសញ្ញាមួយនេះដូចជា ស៊ែប៊ី ប៉ាណាម៉ា អេស្ប៉ាញ និងម៉ិកស៊ិកជាដើម៕
Tag:
អារ៉ាប៊ីសាអូឌីត
អាស៊ាន
ឥណ្ឌូណេស៊ី
© រក្សាសិទ្ធិដោយ thmeythmey.com