កូរ៉េខាងជើង នៅថ្ងៃទី១២ ខែកក្កដា បានបាញ់មីស៊ីលប៉ាលីស្ទិកអន្តរទ្វីប Hwasong-18 ទៅក្នុងសមុទ្រខាងកើត។ មីស៊ីលដែលកូរ៉េខាងជើងចាត់ទុកជាការឆ្លើយតបនឹងសត្រូវរបស់ខ្លួននេះ ត្រូវបានអ្នកជំនាញអះអាងថា អាចវាយប្រហារដែនដីអាម៉េរិកបានគ្រប់ទីកន្លែង។ មីស៊ីល Hwasong-18 អាចហោះបានចម្ងាយលើសពី ១៥០០០គីឡូម៉ែត្រ។ 

 

ក្រោយការបាញ់មីស៊ីលអន្តរទ្វីបជាថ្មីបែបនេះ អាស៊ាន បានបង្ហាញក្តីបារម្ភយ៉ាងខ្លាំង និងជំរុញឱ្យភាគីពាក់ព័ន្ធចូលតុចរចាឡើងវិញ ដើម្បីថែរក្សាស្ថិរភាព និងសន្តិភាពក្នុងតំបន់ និងពិភពលោក។ 

 

«ការកើនឡើងនៃការសាកល្បងមីស៊ីលបាលីស្ទិក និងមីស៊ីលអន្តរទ្វីបរបស់កូរ៉េខាងជើង និងការកើនឡើងភាពតានតឹងនៅឧបទ្វីបកូរ៉េ ជាការវិវដ្ដដ៏គួរឱ្យព្រួយបារម្ភ ដែលគំរាមកំហែងដល់សន្តិភាព និងស្ថិរភាពក្នុងតំបន់»។ រដ្ឋមន្រ្តីការបរទេសអាស៊ាន បានបញ្ជាក់នៅក្នុងសេចក្តីថ្លែងការណ៍រួមចេញនៅថ្ងៃទី១៣ ខែកក្កដាបែបនេះ។ 

 

ទន្ទឹមនេះ រដ្ឋមន្រ្តីការបរទេសអាស៊ាន ក៏បានបញ្ជាក់ពីការប្តេជ្ញារបស់ខ្លួន ចំពោះសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ដែលបានដាក់សម្ពាធ និងទណ្ឌកម្មលើក្រុងព្យុងយ៉ាងផង។ 

 

ចាប់តាំងពីឆ្នាំ២០០៦ ដល់ឆ្នាំ២០១៧ ក្រុមប្រឹក្សាសន្តិសុខអង្គការសហប្រជាជាតិ បានដាក់ទណ្ឌកម្មលើកូរ៉េខាងជើងជាច្រើនលើក ដើម្បីរឹតត្បិតកម្មវិធីអភិវឌ្ឍមីស៊ីល និងនុយក្លេអ៊ែរ។ យ៉ាងណាមិញ រដ្ឋាភិបាលក្រុងព្យុងយ៉ាង នៅតែបន្តជម្នះអភិវឌ្ឍកម្មវិធីអាវុធប្រភេទនេះ ដោយនិយាយការពារថា ទុកសម្រាប់ការពារខ្លួន និងប្រឆាំងសត្រូវ។ 

 

ក្នុងសេចក្តីថ្លែងការណ៍រួមដដែល រដ្ឋមន្រ្តីការបរទេស បានបញ្ជាក់យ៉ាងច្បាស់ៗថា អាស៊ាន បានត្រៀមខ្លួនជាស្រេច ក្នុងការដើរតួនាទីប្រកបដោយការស្ថាបនា រួមទាំងការប្រើប្រាស់វេទិកាតំបន់អាស៊ាន (ARF) សម្រាប់កិច្ចចរចារបស់ភាគីពាក់ព័ន្ធ។ វេទិកាតំបន់អាស៊ាន ជាកិច្ចប្រជុំតែមួយគត់ដែលកូរ៉េខាងជើងចូលរួមជាមួយដៃគូពាក់ព័ន្ធមាន កូរ៉េខាងត្បូង រុស្ស៊ី ចិន ជប៉ុន និងអាម៉េរិកជាដើម៕