ពេលនេះ បរិបទនយោបាយថៃ កំពុងតែស្មុគស្មាញ ខណៈប្រមុខរដ្ឋាភិបាលថៃថ្មី នៅតែមិនទាន់រើសបាន។ ជាថ្មីម្តងទៀត សភាថៃបានប្រកាសលើកពេលរើសនាយករដ្ឋមន្រ្តីថៃថ្មី ដែលគ្រោងធ្វើឡើងនៅថ្ងៃទី៤ ខែសីហា ដោយសារតែតុលាការធម្មនុញ្ញថៃ មិនទាន់សម្រេចលើការបដិសេធរបស់សភាលើការឈរឈ្មោះរបស់លោក Pita Limjaroenrat មេដឹកនាំបក្សឆ្ពោះទៅមុខ ជាបេក្ខជននាយករដ្ឋមន្រ្តីកាលពីថ្ងៃទី១៩ ខែកក្កដា។ 

 

«តុលាការធម្មនុញ្ញ មិនទាន់បានសម្រេចលើពាក្យបណ្តឹងពីការបោះឆ្នោតរើសនាយករដ្ឋមន្រ្តី និងសំណើការិយាល័យស៊ើបអង្កេតថៃក្នុងការលើកថ្ងៃបោះឆ្នោតរើសនាយករដ្ឋមន្រ្តីថៃថ្មី»។ ប្រធានសភាថៃ លោក Wan Muhamad Noor Matha បានបញ្ជាក់បែបនេះ នៅថ្ងៃទី៣ ខែសីហា។ 

 

ការប្រកាសបែបនេះ ធ្វើឡើងនៅប៉ុន្មានម៉ោងប៉ុណ្ណោះ ក្រោយតុលាការធម្មនុញ្ញថៃ បានចេញសេចក្តីថ្លែងការណ៍មួយនៅព្រឹកថ្ងៃទី៣ ខែសីហាថា ពាក្យបណ្តឹងត្រូវតែពិនិត្យឱ្យបានម៉ត់ចត់។ នេះបើតាមការចុះផ្សាយរបស់កាសែតបាងកកប៉ុស្តិ៍។ 

 

តាមសេចក្តីថ្លែងការណ៍នោះ តុលាការបានបញ្ជាឱ្យមន្រ្តីរបស់ខ្លួនសិក្សាពីព័ត៌មានពាក់ព័ន្ធ ដើម្បីគាំទ្រលើការពិនិត្យរបស់ខ្លួនដោយសារតែពាក្យបណ្តឹងនោះមានទាក់ទង នឹងរាជាធិបតេយ្យអាស្រ័យរដ្ឋធម្មនុញ្ញ។ តុលាការធម្មនុញ្ញ ត្រូវបានរំពឹងថា នឹងចេញសេចក្តីសម្រេចនៅថ្ងៃទី១៦ ខែសីហា។ 

 

បក្សឆ្ពោះទៅមុខ ជាអ្នកស្នើឱ្យមានការបកស្រាយលើការច្រានចោលរបស់សភាចំពោះបេក្ខភាពលោក Pita ។

 

គួររំឭកថា បក្សភឿថៃ នៅថ្ងៃទី២ ខែសីហា បានប្រកាសពីបង្កើតសម្ព័ន្ធបក្សនយោបាយថ្មី ដោយមិនបញ្ចូលបក្សឆ្ពោះទៅមុខ។ បក្សភឿថៃ នឹងតែងតាំងលោក Srettha Thavisin ជាបេក្ខជននាយករដ្ឋមន្រ្តី។ ការប្រកាសបែបនេះ ធ្វើឡើងដើម្បីទទួលបានសំឡេងគាំទ្រគ្រប់គ្រាន់ពីសមាជិកព្រឹទ្ធសភាថៃ ដែលភាគច្រើនចង់ឱ្យបក្សឆ្ពោះទៅមុខចេញពីសម្ព័ន្ថបក្សនយោបាយ៕