ខណៈសង្រ្គាមជាមួយអ៊ុយក្រែននៅតែបន្ត និងមិនទាន់មានច្រកចេញ លោក Sergei Shoigu រដ្ឋមន្រ្តីការពារជាតិរុស្ស៊ី បានបំពេញទស្សនកិច្ចនៅអ៊ុយក្រែន ដើម្បីជួបជាមួយមន្រ្តីយោធា ក៏ដូចជាមេបញ្ជាការយោធាខ្លួន។ តាមរូបភាពផ្សាយដោយក្រសួងការពារជាតិរុស្ស៊ីនៅថ្ងៃទី៤ ខែសីហា លោក Shoigu បានជួបជាមួយមន្រ្តី និងពិនិត្យមើលរថយន្តប្រយុទ្ធពាសដែករបស់ស៊ុយអែត ដែលត្រូវរឹបអូសដោយទាហានរុស្ស៊ី។ 

 

ទន្ទឹមនេះ ប្រមុខការពារជាតិរុស្ស៊ីរូបនេះ​​ ក៏ទទួលបានការបកស្រាយពីស្ថានភាពនៅតំបន់សង្រ្គាម ដែលកំពុងវិវដ្ត ពីមេបញ្ជាការរបស់ខ្លួនផង។ ស្របគ្នានេះ លោក Shoigu បានជូនពរឱ្យមេបញ្ជាការ និងកងកម្លាំងទាំងអស់សម្រាប់ប្រតិបត្តិការវាយប្រហារជ័យជម្នះនៅក្នុងតំបន់ Lyman ស្ថិតនៅអ៊ុយក្រែនភាគខាងកើត។ 

 

យ៉ាងណាមិញ ក្រសួងការពារជាតិរុស្ស៊ី មិនបានបញ្ជាក់ពីពេលវេលា​ និងតំបន់ ដែលលោក Shoigu បានបំពេញទស្សនកិច្ចឡើយ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។ 

 

កន្លងមក ប្រមុខការពារជាតិរុស្ស៊ី បានអះអាងថា​ អ៊ុយក្រែនបាត់បង់ទ័ពលើស ២ម៉ឺននាក់ និងសព្វាវុធជាង ២ពាន់គ្រឿង៕