លោក ប៉ិន រដ្ឋា ប្រធានក្រុមបោសសម្អាតគ្រាប់យុទ្ធភណ្ឌមិនទាន់ផ្ទុះ ជាសំណល់សង្គ្រាម រួមជាមួយក្រុមកងឯកភាពកំចាត់មីនទី៥ នៅខេត្តក្រចេះ បានរកឃើញគ្រាប់មិនទាន់ផ្ទុះ

ប្រភេទ M79 ចំនួន២០៣៣គ្រាប់, DK75ចំនួន៦៣គ្រាប់, FuzeM48ចំនួន១៨គ្រាប់ , B40 និងH107 ចំនួន១គ្រាប់។ ការរុករកនេះ ប្រើពេលត្រឹមតែរយៈពេល៣ថ្ងៃហើយ គិតចាប់ពីថ្ងៃទី១១ ដល់ថ្ងៃទី១៣ ខែសីហា។
 

ជាមួយគ្នាដែរ CMAC បានវាយតម្លៃថា គ្រាប់ក្នុងបរិវេណសាលាវិទ្យាល័យ អាចនឹងមានចំនួនច្រើនទៀត។ ក្រុមជំនាញប្រចាំការរុករក បានសម្រេចបិទសាលារៀនជាបណ្តោះអាសន្ន ដើម្បីអនុញ្ញាតផ្តល់លទ្ធភាពឱ្យកម្លាំងស៊ីម៉ាក់ បោសសម្អាត ហើយធានាសុវត្តិភាពដល់សិស្សានុសិស្ស លោកគ្រូអ្នកគ្រូ និងប្រជាពលរដ្ឋក្នុងតំបន់នោះ៕