សម្តេច សាយ ឈុំ ប្រមុខរដ្ឋស្តីទី បានចេញព្រះរាជក្រឹត្យ តែងតាំងសមាភាពក្រុមប្រឹក្សាអ្នកច្បាប់៦៨រូប ទីប្រឹក្សា១៨រូប និងជំនួយការ៥រូប។ លោក វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី ជាប្រធានក្រុមប្រឹក្សា បន្តពីរដ្ឋមន្ត្រីអណត្តិចាស់ លោក ប៊ិន ឈិន។ លោក គី តិច ទេសរដ្ឋមន្ត្រីទទួលបន្ទុកបេសកម្មពិសេស ស្ថិតក្នុងចំណោមអនុប្រធាន៧រូប។ លោក ស៊ា ម៉ៅ ជាអនុប្រធានដែលកាន់តំណែងជាអគ្គលេខាធិការ ដោយមានឋានៈស្មើរដ្ឋមន្ត្រី ដូចលោក លី ច័ន្ទតុលា, លោក សុក ផេង, លោក ហែម ក្រាញ់តូនី, លោក អ៊ឹង សេរីវិសុទ្ធ និងលោក លីវ សុវណ្ណា។
សមាជិកមាន៤៧ និងសមាជិកបម្រុងមាន១៣រូប។ សមាជិក៦រូបមានឋានៈស្មើរដ្ឋមន្ត្រី ដោយលោក អ៊ុត ស៊ីណាត កាន់តួនាទីជាអគ្គលេខាធិការរង។ សមាជិក១៥រូបមានឋានៈស្មើរដ្ឋលេខាធិការ និងសមាជិក២៦រូបមានឋានៈស្មើអនុរដ្ឋលេខាធិការ ដែលក្នុងនោះ លោក ប៉ិច ណាវី កាន់តួនាទីជាអគ្គលេខាធិការរង រីឯលោក ហ៊ួន វណ្ណៈ, លោក ប៉ា ងួនគា និងលោក អ៊ឹង កិរិយា ពុំទទួលប្រាក់បំណាច់មុខងារ។ សមាជិកបម្រុងទាំងអស់ មានឋានៈស្មើអគ្គនាយក។
តាមព្រះរាជក្រឹត្យដដែល ប្រមុខរដ្ឋស្តីទី តែងតាំង និងផ្តល់ឋានៈដល់ទីប្រឹក្សាក្រុមអ្នកច្បាប់ចំនួន១៨រូប ដោយ លោក ហេង វង្សប៊ុនឆាត មានឋានៈស្មើឧបនាយករដ្ឋមន្ត្រី, លោក សំ សុខផល និងលោក ឡាំ ជា មានឋានៈស្មើទេសរដ្ឋមន្ត្រី។
ទីប្រឹក្សា១០រូបមានឋានៈស្មើរដ្ឋមន្ត្រី រួមមាន លោក អ៊ឹម ស៊ីថុល, លោក ឆេង សារឿន, លោក ស៊ុយ ម៉ុងលាង,លោក នាវ ស៊ីថុង, លោក ជីវ សុងហាក់, លោក ប៊ុន ហុន, លោក ទួន ស៊ីផាន់, លោក ឃាង សេង, លោក មាស បូរ៉ា និងលោក ហាក់ សុខហេង។ លោកស្រី ហួត លីដា ជាទីប្រឹក្សាមានឋានៈស្មើរដ្ឋលេខាធិការ រីឯលោកស្រី អ៊ូ ធីតាពៅ, លោក កេង សុម៉ាឡា, លោក ច័ន្ទ វិចិត្រ និងលោក ហាក់ សុភារិទ្ធ មានឋានៈស្មើអនុរដ្ឋលេខាធិការ ដោយពុំទទួលប្រាក់បំណាច់មុខងារ។
ក្រុមប្រឹក្សាអ្នកច្បាប់ ក៏មានជំនួយការ៥រូបផងដែរ ដោយ លោកស្រី នួន ប៊ុនធឿន មានឋានៈស្មើអនុរដ្ឋលេខាធិការ រីឯលោក ជួង សុផល, លោកស្រី ឆេង សុវណ្ណការ, លោក ទូច ធារិទ្ធិ និងលោក ឡេង ប៊ុនស្រ៊ាន មានឋានៈស្មើអគ្គនាយក។
ក្រុមប្រឹក្សាអ្នកច្បាប់ត្រូវបានបង្កើតឡើងនៅឆ្នាំ១៩៩៤ ។ យោងអនុក្រឹត្យលេខ៣២ អនក្រ.បក ក្រុមប្រឹក្សាអ្នកច្បាប់ស្ថិតក្រោមការគ្រប់គ្រងនិងដឹកនាំផ្ទាល់របស់ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី។ សមាសភាពក្រុមប្រឹក្សាអ្នកច្បាប់ត្រូវតែងតាំងដោយព្រះរាជក្រឹត្យ និងមានអគ្គលេខាធិការដ្ឋានជាជំនួយការ។
ចាប់តាំងពីពេលបង្កើតមក ក្រុមប្រឹក្សាអ្នកច្បាប់ដែលជាអង្គភាពអមទីស្តីការគណៈរដ្ឋមន្រ្តី បាន បំពេញតួនាទីជាសេនាធិការជូនរាជរដ្ឋាភិបាល ក្នុងការសម្របសម្រួលការងារតាក់តែងនិងក្នុងការពិនិត្យ ផ្តល់យោបល់ លើសេចក្តីព្រាងច្បាប់និងលិខិតបទដ្ឋានគតិយុត្តផ្សេងទៀត គោលនយោបាយ ផែនការ យុទ្ធសាស្រ្ត និងឯកសារផ្សេងៗ៕