ព័ត៌មាននៃកិច្ចព្រមព្រៀងអង្ករបានកើតឡើងនៅក្នុងសេចក្តីថ្លែងការណ៍មួយដែលបានចេញ ផ្សាយបន្ទាប់ពីនាយករដ្ឋមន្រ្តីវៀតណាម លោក ផាម មិញឈិញ និងប្រធានាធិបតី ហ្វីលីពីនលោក Ferdinand Marcos Jr. បានជួបគ្នា នៅក្រៅកិច្ចប្រជុំកំពូលអាស៊ាននៅឥណ្ឌូណេស៊ី ប៉ុន្តែមិនមានព័ត៌មាន លម្អិតបន្ថែមនោះទេ។

 

«គ្រាន់តែមាន (កិច្ចព្រមព្រៀង) នោះ ជាការធានាមួយនឹងធ្វើឱ្យស្ថានការណ៍មានស្ថិរភាព មិន ត្រឹមតែសម្រាប់ហ្វីលីពីនប៉ុណ្ណោះទេ ប៉ុន្តែសម្រាប់យើងទាំងអស់គ្នានៅក្នុងតំបន់»។ លោក Marcos Jr. បានប្រាប់នាយករដ្ឋមន្រ្តីវៀតណាមបែបនេះ។ នេះបើតាមសេចក្តីថ្លែងការណ៍របស់ប្រធានាធិបតីហ្វីលីពីន។ 

 

វៀតណាម ជាប្រទេសនាំចេញអង្ករធំជាងគេទី ៣ របស់ពិភពលោកកាលពីឆ្នាំមុន បន្ទាប់ ពីឥណ្ឌា និងថៃ ហើយហ្វីលីពីន ជាអ្នកទិញអង្ករចូលធំបំផុត ដើម្បីបំពេញតម្រូវការនាំអង្ករចូលជិត៩០ ភាគរយ។ លោក Marcos ដែលជារដ្ឋមន្រ្តីកសិកម្មហ្វីលីពីនផងដែរ បានស្វាគមន៍ការ ផ្តល់ជូនរបស់ប្រទេសជិតខាងនៃកិច្ចព្រមព្រៀងផ្គត់ផ្គង់រយៈពេលប្រាំឆ្នាំ។

 

នៅសប្តាហ៍នេះ ហ្វីលីពីនបានចាប់ផ្តើមអនុវត្តការរឹតបន្តឹងតម្លៃអង្ករ ដើម្បីការពារអ្នកប្រើប្រាស់ ប្រឆាំងនឹងតម្លៃគ្រប់គ្រងដោយពាណិជ្ជករនៅក្នុងសម្ព័ន្ធជាមួយនឹងក្រុមជួញដូរឧស្សាហកម្ម។ តម្លៃអង្ករពិភពលោកបានកើនឡើងដល់កម្រិតខ្ពស់ក្នុងរយៈពេល១៥ឆ្នាំ បន្ទាប់ពីឥណ្ឌាដែលចូលរួមច្រើនជាង ៤០ ភាគរយនៃពាណិជ្ជកម្មពិភពលោកបានបញ្ជាឱ្យផ្អាកនៅក្នុងខែកក្កដា ចំពោះប្រភេទអង្ករការនាំចេញដ៏ធំបំផុតរបស់ខ្លួន ក្នុងគោលបំណងធ្វើឱ្យតម្លៃក្នុងស្រុកមានស្ថិរភាព៕