ការប្រកួតក្នុងពូល F ក្រុម Newcastle United ដែលស្ថិតក្រោមការដឹកនាំរបស់លោក Eddie Howe បានធ្វើដំណើរទៅកាន់ប្រទេសអ៊ីតាលីសម្រាប់ត្រៀមខ្លួនប្រកួតប្រជែងក្នុងពានរង្វាន់ UCL សារជាថ្មីក្រោយខកខាន រយៈពេល ២០ឆ្នាំ។ AC Milan នឹងបើកទ្វារកីឡដ្ឋាន San Siro ស្វាគមន៍ក្រុមសារិកាព្រៃរបស់អង់គ្លេស។
 

សម្រាប់ការប្រកួពានរង្វាន់ក្របខណ្ឌកំពូលអឺរ៉ុប លោក Howe ដែលជាគ្រូបង្វឹកក្រុមកំពុងឡើងជើង Newcastle ចាត់ទុកថាជារឿងដ៏មានមោទកភាពបំផុត។ លោក Howe បាននិយាយដូច្នេះថា ៖ « វាគឺជាការប្រកួតបាល់ទាត់ ដ៏អស្ចារ្យ ដែលយើងត្រូវតែខិតខំ។ ពិតណាស់ វាជាការប្រកួតដ៏ពិសេស ដូច្នេះហើយយើងត្រូវធ្វើឱ្យបានល្អនូវអ្វីដែលជាភាពខ្លាំងរបស់យើង។»។
  

ស្ថិតក្នុងការប្រជែង Champions League នេះក្រុម AC Milan ជាក្រុមមួយដែលមានកេរ្តិ៍ឈ្មោះធ្លាប់ល្បីល្បាញខ្លាំងបំផុត ដោយគ្រងជើងឯកក្របខណ្ឌអឺរ៉ុបចំនួន ៧សម័យ ច្រើនជាងគេលំដាប់ទី២ បន្ទាប់ពីក្រុម Real Madrid ដែលជាម្ចាស់ជើងឯក ១៤សម័យកាល ។ AC Milan បានគ្រងជើងឯក Champions League ចុងក្រោយ នៅពេល Newcastle United បានចូលរួមចុងក្រោយដែរក្នុងរដូវកាល ២០០២-០៣។
 

ក្លាយជាក្រុមដែលទើបវិលត្រលប់មកការប្រកួតប្រជែងសារជាថ្មី ហើយធ្លាក់ចូលទៅក្នុងការប្រកួតប្រជែងក្នុងពូលដ៏តានតឹងដោយរួមមានក្រុមខ្លាំងៗដូចជា Paris Saint Germain, Borussia Dortmund ជាដើម។ ក្រុមសារិកាព្រៃនឹងត្រូវឆ្លងកាត់ក្រុម AC Milan ដែលជាក្រុមចំណាត់ថ្នាក់លេខ ៤ រដូវកាលមុនជាមុនសិនសម្រាប់ជើងទីមួយនេះ។ ក្រុមទាំងពីរនឹងត្រូវប៉ះគ្នាលើកដំបូងបង្អស់ប្រចាំប្រវត្តិសាស្ត្រ។
  

​ជំនួបដ៏តានតឹងមួយគូបន្ថែមទៀតនៃពូល F ក្រុម Paris Saint Germain នឹងត្រូវបើកទ្វារផ្ទះកីឡដ្ឋាន Parc de Princes ទទួលក្រុមជើងខ្លាំងមកពីអាល្លឺម៉ង់ Borussia Dortmund។ នេះជាការប្រកួតវគ្គចែកពូលដែលជាការប៉ះគ្នាសារជាថ្មីម្តងទៀត ដោយក្រុមទាំងពីរធ្លាប់បានប៉ះគ្នា ២ដង រួចមកហើយនៅក្នុង UCL នេះ កាលពីរដូវកាល ២០២០-២១។
 

ដោយឡែកការប្រកួតវេលាម៉ោង ១១:៤៥យប់ ទន្ទឹមគ្នា ក្រុម Young Boys របស់ស្វ៊ីសនឹងត្រូវបើកទ្វារកីឡដ្ឋាន Stade de Suisse ស្វាគមន៍ក្រុមភ្ញៀវដែលតែងមានវត្តមានមិនចេះដាច់រយៈពេលជាង ៥រដូវកាល RB Leipzig មកពីអាល្លឺម៉ង់ សម្រាប់ជំនួបបើកឆាកពូល G ជើងទីមួយ។ Young Boys និង​ RB Leipzig ក៏នឹងក្លាយជាគូប្រជែងដែលត្រូវប៉ះគ្នាលើកដំបូងបង្អស់ប្រចាំប្រវត្តិសាស្ត្រនៃក្រុមទាំងពីរផងដែរ។
 

ការប្រកួតវគ្គចែកពូលដទៃផ្សេងទៀតនៃ UCL ដែលនឹងត្រូវចាប់ផ្តើមពីថ្ងៃទី១៩ ខែកញ្ញា៖
 

ក្រុម Feyenoord ទទួល Celtic

ក្រុម Lazio ទទួល Atletico Madrid
 

ក្រុម Manchester City ទទួល ​FK Crvena Zvezda
 

ក្រុម Barcelona ទទួល Royal Antwerp

ក្រុម Shakhtar Donetsk ទទួល FC Porto៕