ក្នុងការរបាយការណ៍របស់ខ្លួន IEA បញ្ជាក់ថា ប្រទេសអ្នកមាន ឥឡូវនេះ​ត្រូវ​ឈាន​ដល់​អព្យាក្រឹត​ភាព​កាបូននៅក្នុងរង្វង់ឆ្នាំ២០៤៥  ហើយចិនគួរតែបង្កើនល្បឿន​មួយក្នុងរយៈពេលដប់ឆ្នាំត្រឹមឆ្នាំ២០៥០ ដើម្បីរក្សាសម្រេចគោលដៅកិច្ចព្រមព្រៀងទីក្រុងប៉ារីសដែលកំណត់ការឡើងកំដៅត្រឹម១,៥អង្សា។

 

«ពិភពលោកបានពន្យារពេលយូរពេកដើម្បីជៀសវាងជម្រើសពិបាក»។ ទីភ្នាក់ងារឃ្លាំមើលថាមពល​ពិភពលោកលើកឡើងបែបនេះក្នុងរបាយការណ៍មួយមុនកិច្ចពិភាក្សាស្តីពីអាកាសធាតុរបស់អង្គការសហប្រជាជាតិ (UN) ។

 

ប្រធាន IEA លោក Fatih Birol បាននិយាយថា លោកមានក្តីសង្ឃឹមច្រើនជាងកាលពី២ឆ្នាំមុនដើម្បីសម្រេចគោលដៅខាងលើ ដោយសារការកើនឡើងការប្រើប្រាស់ថាមពលពន្លឺព្រះអាទិត្យ និងការលក់​រថយន្តអគ្គិសនីស្របតាមផែនការរបស់ IEA ។ លោក Birol បាន​សរសើរ​គោល​នយោបាយ​គួរ​ឱ្យ​ចាប់​អារម្មណ៍នៅអាម៉េរិក អឺរ៉ុប ចិន និងឥណ្ឌា ដែលបានជួយជំរុញការវិនិយោគ​ថាមពល​ស្អាត​កើន​ឡើង​៤០ភាគរយ ជាមួយទំហំទឹកប្រាក់១,៨ពាន់ពាន់លានដុល្លារនៅឆ្នាំនេះ។ ប៉ុន្តែ​លោក​សម្គាល់ថា ដើម្បី​ឈាន​ដល់​កម្រិតសូន្យនោះ ​តម្រូវការលុយមានដល់​៤,៥ពាន់​ពាន់​លាន​ដុល្លារនៅ​ឆ្នាំ២០៣០។

 

របាយការណ៍របស់ IEA សង្កត់ធ្ងន់ពីការជំរុញដោយគោលនយោបាយ​ក្នុងការបង្កើន​សមត្ថភាព​ថាមពលស្អាត ដែលប្រភពថាមពលត្រូវការជាចាំបាច់ដើម្បីរុញឱ្យតម្រូវការឥន្ធនៈហ្វូស៊ីល​ធ្លាក់​ចុះ២​៥​ភាគរយនៅឆ្នាំ២០៣០។ ថាមពលស្អាតនេះ ក៏ជួយបើកផ្លូវក្នុងការឈានទៅរកគោលដៅកំណត់​ការ​ឡើងកំដៅត្រឹម​១,៥អង្សា៕