បើតាមទីភ្នាក់ងារព័ត៌មាន Reuters កាលពីសប្តាហ៍មុន ប៉ូលិសក្រុងហាណូយបានឃុំខ្លួន​នាយក​ប្រតិបត្តិនៃគំនិតផ្តួចផ្តើមវៀតណាមសម្រាប់ការផ្លាស់ប្តូរថាមពល (VIET) លោកស្រី Ngo Thi To Nhien ដែលជាអ្នកវិភាគឯករាជ្យផ្តោតលើគោលនយោបាយថាមពលបៃតង។

 

«យើងដឹងពីការចាប់ខ្លួននេះ ហើយកំពុងតាមដានការវិវឌ្ឍដោយក្តីបារម្ភ»។ លោកស្រី Ravina Shamdasani អ្នកនាំពាក្យការិយាល័យឧត្តមស្នងការ UN ទួលបន្ទុកសិទ្ធិមនុស្ស (OHCHR) បាន លើកឡើងបែបនេះ។

 

កន្លងមក លោកស្រី Nhien បានធ្វើការឱ្យធនាគារពិភពលោកជាមួយនឹងកម្មវិធីអភិវឌ្ឍន៍ UN (UNDP) និងព្រមទាំងទីភ្នាក់ងារជំនួយអាម៉េរិក USAID ដែរ។ លោកស្រីបាន​ចូលរួម​ក្នុង​ព្រឹត្តិការណ៍​អន្តរជាតិ និងថ្នាក់ជាតិ រួមទាំងការពិគ្រោះយោបល់ដែលរៀបចំដោយ UNDP លើ​ប្រធាន​បទនៃ​ការ​ផ្លាស់ប្តូរថាមពល ។

 

ទាក់ទងរឿងនេះ មន្ត្រីក្រសួងការបរទេសអាម៉េរិកអះអាងថា ទីក្រុងវ៉ាស៊ីនតោន​តែងតែ​អំពាវនា​វ​ឱ្យ​វៀតណាមគោរពនិងការពារសិទ្ធិមនុស្ស ប៉ុន្តែមិនផ្ដល់ការអត្ថាធិប្បាយជាក់លាក់ណាមួយអំពីការឃុំ​ ខ្លួនលោកស្រី Nhien ដែលធ្វើឡើងមិនខុសគ្នាប៉ុន្មានពីដំណើរទស្សនកិច្ចរបស់លោក ចូ បៃឌិន នោះទេ។

 

ក្នុងរយៈពេលពីរឆ្នាំចុងក្រោយនេះ វៀតណាមបានចាប់ខ្លួនអ្នកការពារសិទ្ធិមនុស្ស​ផ្នែក​បរិស្ថាន​ចំនួន​៥​នាក់ ដោយចោទប្រកាន់ពួកគេ​ពី​បទគេចពន្ធ ស្របពេល ប្រទេសនេះកំពុងចរចាផ្តល់មូលនិធិអន្តរជាតិ​សម្រាប់ការផ្លាស់ប្តូរថាមពលចេញពីធ្យូងថ្ម៕