កីឡាអន្តរជាតិ
អន្តរជាតិ
EFL៖ Pochettino សង្ឃឹមថា Chelsea នឹងស្ទុះងើបឡើងវិញក្រោយទម្លាក់ Brighton 28, Sep 2023 , 10:29 pm
× លោក Mauricio Pochettino អ្នកចាត់ការក្រុម Chelsea បង្ហាញក្តីសង្ឃឹមរបស់លោកថាកូនក្រុមនឹងកសាងទម្រង់លេងប្រសើរឡើងវិញ តាមរយៈការទម្លាក់ក្រុម Brighton & Hove Albion នៅពានរង្វាន់ EFL Cup ជុំទី៣ ក្នុងលទ្ធផល ១-០។ អ្នកចាត់ការសញ្ជាតិអាហ្សង់ទីនក៏រំពឹងថាក្រុមនឹងនាំមកនូវលទ្ធផលល្អសម្រាប់ការប្រជែងក្របខណ្ឌ Premier League។
ជ័យជម្នះលើក្រុម Brighton & Hove Albions ដែលជាក្រុមស្ថិតក្នុងកំពូលទាំង ៤ នៃ EFL Cup រដូវកាលមុន ធ្វើបានដោយការស៊ុតបាល់យ៉ាងល្អពីសំណាក់កីឡាករ Nicolas Jackson នៅនាទី៥០។ Chelsea រកបានកៅអីការប្រកួតជុំទី៤ ដោយត្រូវជួបក្រុម Blackburn Rovers នៅថ្ងៃទី៣០ ខែតុលា។
ចំណែកនៅក្នុង Premier League វិញក្រុមរហស្សនាមតោខៀវ កំពុងតែស្ថិតនៅក្នុងចំណាត់ថ្នាក់លេខ ១៤ ដែលជាលទ្ធផលមិនសូវល្អឡើយសម្រាប់ពួកគេ ដោយការប្រកួត ៦លើក រកបានជ័យជម្នះត្រឹម ១លើកប៉ុណ្ណោះ ស្មើ២ និងចាញ់ ៣លើក ស៊ុតបញ្ចូលទីបានត្រឹមតែ ៥គ្រាប់ប៉ុណ្ណោះ។
«វាគឺជាការឆ្លើយតបយ៉ាងល្អពីសំណាក់ក្រុមទាំងមូល ខ្ញុំរីករាយជាមួយនឹងទម្រង់លេងនៅថ្ងៃនេះ ខ្ញុំរីករាយសម្រាប់ជ័យជម្នះ ព្រោះថាថ្ងៃនេះយើងត្រូវតែឈ្នះ។ នៅក្នុងវគ្គទីពីរយើងបានគ្រប់គ្រងការប្រកួតទាំងស្រុងយើងសមនឹងទទួលបានជោគជ័យ ខ្ញុំគិតថានេះគឺជារឿងសំខាន់បំផុតសម្រាប់យើងបន្តប្រកួតប្រជែង ការកសាងទំនុកចិត្តរបស់យើង យើងសង្ឃឹមថាយើងនឹងធ្វើបានល្អដូចនេះថែមទៀតនៅពេលអនាគត។»។ លោក Pochettino បាននិយាយក្នុងសន្និសីទកាសែតបែបនេះ។
ក្រុម Chelsea នឹងវិលត្រលប់សម្រាប់ការប្រកួតប្រជែងនៃក្របខណ្ឌ Premier League ឡើងវិញនៅថ្ងៃទី១ ខែតុលា ដោយត្រូវធ្វើដំណើរទៅកាន់ទឹកដីរបស់ក្រុម Fulham៕
© រក្សាសិទ្ធិដោយ thmeythmey.com