កីឡាអន្តរជាតិ
អន្តរជាតិ
លោក Ten Hag ៖ គ្មានលេសនោះទេ គឺយើងធ្វើមិនល្អគ្រប់គ្រាន់ឡើយ 01, Oct 2023 , 3:19 pm
× លោក Erik ten Hag អ្នកចាត់ការក្រុម Manchester United បារម្ភពីការចាប់ផ្តើមមិនល្អរបស់កូនក្រុម នៅដើមរដូវកាល បន្ទាប់ពីក្រុមបន្តប្រកួតចាញ់ជាបន្តបន្ទាប់។ Man United ចាញ់ក្រុម Crystal Palace លទ្ធផល ១-០ ដល់ក្នុងទឹកដី Old Trafford នាថ្ងៃទី៣០ ខែកញ្ញា។
៧ប្រកួតនៅ Premier League ក្រុមបិសាចក្រហមរងបរាជ័យ ៤ប្រកួតរួចទៅហើយ ដែលនេះជាកំណត់ត្រាដ៏អាក្រក់បំផុតសម្រាប់ពួកគេ បើគិតចាប់តាំងពីរដូវកាល ១៩៨៩-៩០ មក។
នេះជាការចាញ់ជាបន្តបន្ទាប់នៅក្នុងទឹកដីសម្រាប់ Man United ដែលរបូត ៣ពិន្ទុទៅកាន់ក្រុម Crystal Palace ដោយកីឡាករ Joachim Andersen បានស៊ុតគ្រាប់ជ័យជម្នះតាំងតែពីវគ្គទីមួយ។ Man United ហាក់គ្មានឱកាសល្អៗដើម្បីរកបានគ្រាប់បាល់មកវិញ ក៏ដូចជាឱកាសនៃការស៊ុត។ ការចាញ់ក្នុងទឹកដី ២លើកជាប់គ្នាកាលពីមុនរបស់ Man United នៅឆ្នាំ ២០២១ ដោយកាលនោះចាញ់ Liverpool និង Manchester City ពេលដែលក្រុមនៅក្រោមការដឹកនាំរបស់លោក Ole Gunnar Solskjaer។
«ខ្ញុំដឹងថាអ្នកគាំទ្រគឺរំពឹងជ័យជម្នះ ដែលយើងមិនបានយកឈ្នះហើយយើងប្រែជាចាញ់ការប្រកួត។ ពិតណាស់នេះជារឿងគួរឱ្យបារម្ភ យើងត្រូវបានពង្រឹងឱ្យបានល្អជាងនេះ រឿងរ៉ាវអាក្រក់បែបនេះមិនសមធ្លាក់មកលើក្រុម Manchester United ឡើយ យើងត្រូវការឈ្នះជាបន្តបន្ទាប់ដើម្បីអាចប្រជែងនឹងក្រុមគេបាន យើងត្រូវតែធ្វើឱ្យបានល្អឡើងវិញចាប់ពីពេលនេះទៅ។ ខ្ញុំអាចឱ្យអ្នកនៅហេតុផលបានថា គ្មានលេសទេ គឺយើងមិនល្អគ្រប់គ្រាន់។»។ លោក Ten Hag បាននិយាយក្នុងសន្និសីទកាសែតក្រោយចប់ការប្រកួតបែបនេះ។
Man United បានបំបាក់ក្រុម Burnley នៅក្នុងជំនួប Premier League កាលពីសប្តាហ៍មុន មុនពេលមកយកឈ្នះលើក្រុម Crystal Palace ក្នុងពានរង្វាន់ EFL Cup លទ្ធផល ៣-១។ ប៉ុន្តែវិលមកការប្រកួត Premier League ពួកគេបែរជាត្រូវក្រុមដែលបានយកឈ្នះហើយបំបាក់ពួកគេទៅវិញ។
Palace ដណ្តើមបាន ៣ពិន្ទុឡើងមកឈរនៅចំណាត់ថ្នាក់លេខ ៩ ដោយទម្លាក់ក្រុម Manchester United ទៅឈរនៅចំណាត់ថ្នាក់លេខ ១០ នៃតារា Premier League៕
Tag:
Erik ten Hag
Manchester United
© រក្សាសិទ្ធិដោយ thmeythmey.com