បើទោះប៉ូលិសក្រុងណាកាហ្សាគី មិនត្រូវបានហាមឃាត់ឱ្យពាក់វែនតាការពារពន្លឺព្រះអាទិត្យក្នុងអំឡុងពេលបំពេញការងារ ប៉ុន្តែប៉ូលិសជប៉ុននេះ តែងបារម្ភពីការពាក់វែនតា ក្រោយហេតុផលបំភ័យប្រជាជននៅក្នុងស្រុក។

 

យ៉ាងណាមិញ ចាប់តាំងពីថ្ងៃទី១៩ ខែកញ្ញា មន្រ្តីប៉ូលិសក្រុងណាកាហ្សាគី ត្រូវបានគាំទ្រឱ្យប្រើប្រាស់វែនតាខ្មៅ ក្នុងអំឡុងពេលបើកបររថយន្តល្បាត បន្ទាប់ពីមន្រ្តីប៉ូលិសបានត្អូញត្អែរពីបញ្ហាក្នុងពេលបើកបរ ពាក់ព័ន្ធនឹងពន្លឺ ក៏ដូចជាហេតុផលក្នុងការការពារកាំរស្មីយូវី។ 

 

«យើងចាប់ផ្តើមចំណាត់ការនេះ ដើម្បីបង្ការឧបទ្ទវហេតុក្នុងពេលល្បាត និងការបន្ថយបញ្ហាប៉ះពាល់ភ្នែក។ យើងសង្ឃឹមថា សាធារណជននឹងយល់ពីបញ្ហានេះ»។ លោក Yoshiteru Oba មន្រ្តីប៉ូលិសក្រុងណាកាហ្សាគី បានបញ្ជាក់បែបនេះ។

 

ក្រៅពីក្រុងណាកាហ្សាគី ប៉ូលិសក្រុង Toyama ក៏អនុញ្ញាតឱ្យមន្រ្តីខ្លួនពាក់វែនតាការពារពន្លឺថ្ងៃផងដែរ ក្នុងតំបន់មានចរាចរណ៍ច្រើន ចាប់តាំងពីខែកក្កដាមកម្លេះ៕