ក្រោមប្រតិបត្តិការ «សង្រ្គាមដាវដែក» អ៊ីស្រាអែល បានប្តេជ្ញាប្រយុទ្ធយកជ័យជម្នះលើសង្រ្គាមប្រឆាំងនឹងក្រុមហាម៉ាស ដែលបានវាយប្រហារដោយមិនជូនដំណឹងជាមុន​ នៅថ្ងៃទី៧ ខែតុលា។ ពេលនេះ អ៊ីស្រាអែល បានកោះហៅកម្លាំងទ័ពបម្រុងរហូតដល់ ៣០ម៉ឺននាក់ ដើម្បីចូលរួមប្រយុទ្ធ ខណៈចំនួនប្រជាជនអ៊ីស្រាអែល កាន់តែស្លាប់ច្រើនឡើង។ 

 

បន្ថែមពីនេះ កងទ័ពអាកាសអ៊ីស្រាអែល បានប្រកាសទៅយកទ័ពបម្រុងនៅអឺរ៉ុបថែមទៀត ដើម្បីមកជួយវាយក្រុមសកម្មប្រយុទ្ធហាម៉ាស។ 

 

«យប់នេះ យន្តហោះដឹកជញ្ជូនកម្លាំងទ័ពអាកាស បានត្រលប់មកអ៊ីស្រាអែលវិញជាមួយអ្នកប្រយុទ្ធជាច្រើនរយនាក់នៅបរទេស»។ កម្លាំងទ័ពអាកាសអ៊ីស្រាអែល បានបញ្ជាក់បែបនេះ នៅលើបណ្តាញសង្គម X ក្នុងថ្ងៃទី១០ ខែតុលា។ យ៉ាងណាមិញ អ៊ីស្រាអែល មិនបានបញ្ជាក់ឡើយថា ខ្លួនយកទ័ពបម្រុងនោះ មកពីប្រទេសអឺរ៉ុបមួយណា។ 

 

ការកោះហៅកម្លាំងទ័ពបម្រុងរហូតដល់ ៣០ម៉ឺននាក់របស់អ៊ីស្រាអែល ដើម្បីប្រយុទ្ធតទល់នឹងក្រុមហាម៉ាសនេះ ជាចំនួនដ៏ច្រើនបំផុតនៅក្នុងប្រវត្តិសាស្រ្តអ៊ីស្រាអែល។ នេះបើតាមការចុះផ្សាយរបស់សារព័ត៌មាន Bloomberg។ 

 

ម្យ៉ាងវិញទៀត ការកោះហៅទ័ពបម្រុងនោះទៀតសោត ធ្វើឡើងស្របពេលមានក្តីបារម្ភថា អ៊ីស្រាអែល អាចចាប់ផ្តើមប្រតិបត្តិការយោធាផ្លូវគោក ដើម្បីវាយប្រហារលើតំបន់កាហ្សា និងបោសសម្អាតក្រុមហាម៉ាស។ 

 

ក្នុងថ្ងៃដដែលនេះ យោធាអ៊ីស្រាអែល បានបញ្ជាក់ថា ខ្លួនបានគ្រប់ឡើងវិញលើព្រំដែនជាមួយកាហ្សា ហើយបានបង្កប់មីន នៅកន្លែងក្រុមហាម៉ាស បានបំផ្លាញរបាំងតាមព្រំដែន ដើម្បីចូលមកក្នុងដែនដីខ្លួន៕