អន្តរជាតិ
នយោបាយអន្តរជាតិ
ជម្លោះហាម៉ាស-អ៊ីស្រាអែល ៖ ចិនថ្កោលទោសសកម្មភាពដែលបង្កគ្រោះថ្នាក់ដល់ជនស៊ីវិល 13, Oct 2023 , 2:30 pm
រូបភាព ៖ AP
× ចិនមានការព្រួយបារម្ភយ៉ាងខ្លាំងចំពោះការបង្កើនភាពតានតឹង និងអំពើហិង្សារវាងអ៊ីស្រាអែល និងប៉ាឡេស្ទីន ព្រមទាំងថ្កោលទោសសកម្មភាពដែលបង្កគ្រោះថ្នាក់ដល់ជនស៊ីវិល និងអំពាវនាវឱ្យមានបទឈប់បាញ់។
នៅថ្ងៃទី១២ ខែតុលា ក្រសួងការបរទេសចិនបាននិយាយថា ទីក្រុងប៉េកាំងមានការព្រួយបារម្ភយ៉ាងខ្លាំងអំពីជម្លោះអ៊ីស្រាអែលនិងក្រុមហាម៉ាសដែលកំពុងកើនឡើង។
នៅក្នុងការសន្ទនាតាមទូរស័ព្ទជាមួយមន្ត្រីក្រសួងការបរទេសអ៊ីស្រាអែលលោក Rafael Harpaz បេសកជនពិសេសចិនប្រចាំតំបន់មជ្ឈិមបូព៌ាលោក Zhai Jun បានលើកឡើងថា ចិនមានការព្រួយបារម្ភយ៉ាងខ្លាំងចំពោះការបង្កើនភាពតានតឹង និងអំពើហិង្សារវាងអ៊ីស្រាអែល និងប៉ាឡេស្ទីនដែលកំពុងតែឡើងកម្តៅ។ លោកមានការស្ដាយចំពោះជនស៊ីវិលដែលរងរបួសដោយសារជម្លោះ។
លោក Zhai Jun បានសង្កត់ធ្ងន់ថា ៖« ទីក្រុងប៉េកាំងថ្កោលទោសចំពោះសកម្មភាពដែលបង្កគ្រោះថ្នាក់ដល់ជនស៊ីវិល អំពាវនាវឱ្យមានបទឈប់បាញ់និងបញ្ចប់អំពើហិង្សាឱ្យបានឆាប់តាមដែលអាចធ្វើទៅបាន ក៏ដូចជាការបន្តការចរចាសន្តិភាព និងបង្កើតការជឿទុកចិត្តក្នុងចំណោមប្រជាជននៃភាគីទាំងពីរក្នុងការខិតខំប្រឹងប្រែងកសាងសន្តិភាព»។
ចិនសង្ឃឹមថា អ៊ីស្រាអែលនិងប៉ាឡេស្ទីនអាចរួមរស់ជាមួយគ្នាដោយសន្តិវិធី និងមានឆន្ទៈក្នុងការសម្របសម្រួលជាមួយសហគមន៍អន្តរជាតិ ដើម្បីជំរុញកិច្ចចរចាសន្តិភាព និងបង្កើតលក្ខខណ្ឌដើម្បីទទួលបានសន្តិភាព។ នេះបើតាមកាលើកឡើងរបស់លោក Zhai Jun ។
មកទល់ពេលនេះ យោធាអ៊ីស្រាអែល បានបន្តវាយលុកគោលដៅរបស់ក្រុមហាម៉ាសនៅតំបន់ជ្រោយហ្គាហ្សាសម្រាប់ថ្ងៃទី៧ ជាការសងសឹកការវាយប្រហាររបស់សកម្មប្រយុទ្ធប៉ាឡេស្ទីនមួយនេះ ដែលធ្វើឱ្យចំនួនអ្នកស្លាប់បានកើនឡើងដល់រាប់ពាន់នាក់ទៅហើយ៕
Tag:
ចិន
ហាម៉ាស
អ៊ីស្រាអែល
© រក្សាសិទ្ធិដោយ thmeythmey.com